MIPALUYOG si Mayor Eduardo Gullas sa plano ni Presidente Rodrigo Duterte nga subling ikanselar ang piniliay sa barangay nga gikatakda na unta karong buwan sa Oktubre.
Gani, si Duterte mipadayag sa iyang huna-huna nga itudlo nalang usab ang mga opisyal sa barangay aron mapugngan kadtong mga molingkod sa barangay nga giingong nalambigit sa ilegal nga drugas.
Matod ni Gullas nga posibling nahadlok ang presidente nga ang modaug sa eleksyon mao kadtong mga gipaluyohan sa mga drug lord o ba kaha ang opisyal mismo nalambigit sa ilegal.
Apan usa sa gikabalak-an ni Gullas mao kadtong matudlo apan ang mga nagpuyo sa barangay wa makauyon sa tawo nga gitudlo nga kuwang kinig suporta.
Hinuon bisan pa niini si Gullas miingon nga iyang gipaluyohan ang bisan unsang lakang sa presidente ilabi na sa kampanya batok sa drugas.
Una niini si Konsehal Raul Cabanero, presidente sa Association of Barangay Council (ABC) sa dakbayan sa Talisay, supak sa plano nga iuswag ang eleksyon.
Matod ni Cabanero nga mas maayong madayon aron mailisan kadtong mga opisyal sa barangay nga way nahimo ug mga tapulan.
Nitataw ang opisyal nga mas maayo usab nga hatagan og higayon ang mga tawo sa barangay nga makapili kinsa ilang gustong mamahimong opisyal sa barangay ug di kay tinudlo.
“Gusto ko naay election, matira matibay, makita gyud kun kinsa ang mga tapulan, makita ang katag,” matod niya.