DUNGGON sa Land Transportation Franchising and Regulatory Board (LTFRB) sa Central Visayas karong Abril 5 ang petisyon sa Cebu Integrated Transport Service Cooperative (Citrasco) nga nangayo og umento sa pletihan sa oras tingsakay o tingtrapik.
Si Ahmed Cuizon, regional director sa LTFRB 7, nipahibawo nga sugdan ang public hearing sa alas 9:30 sa buntag sa Cebu Normal University, siyudad sa Sugbo.
Sa giduso nga petisyon, ang Citrasco nangayo og P1.50 nga usbaw sa pletihan sa public utility jeepney (PUJ) gikan sa alas 7:00 sa buntag hangtod alas 9:00 sa buntag ug alas 5:00 sa hapon hangtod alas 7:00 sa gabii.
Sa kasamtangan, P6.50 ang minimum nga pletihan sa PUJ.
Si Yu unang niingon nga gumikan sa kahuot sa dagan sa trapiko sa kadalanan sa Metro Cebu ang hinungdan sa ilang pagpangayo og umento sa pletihan, ikaduha na ang presyo sa mga produktong petrulyo.
Kahinumdoman, ang mga kahugpongan sa mga drayber sa jeeney didto sa kaulohan nipasaka sa samang hangyo ug gitugotan na sa LTFRB apan walay labot sa pletihan sa lalawigan.