NUNOT ning pagsulod sa summer season ug sa gilantawan nga subling pagtumaw sa El Niño, ang Provincial Veterinarian’s Office nipahinumdum sa mga nagbuhi og mga kahayupan sa pagpainom kanunay og tubig sa ilang mga binuhi aron dili ma-dehydrate.
Importante usab nga dili sila maigo sa direktang kainit sa adlaw.
Sigun ni Provincial veterinarian, Dr. Mary Rose Vincoy, ang tubig maoy labing importante nga panagang sa kahayupan batok sa grabeng kainit sa panahon nga mugna sa summer season ug sa gilantawan nga pagbalik sa huwaw.
Gawas sa paghatag ug insaktong pagkaon, vitamins ug tubig sa mga binuhing baboy, tambag ni Vincoy nga ligu-on usab kini kaduha o katulo sa usa ka adlaw aron dili maapektohan sa kainit.
Ang mga manok, importante usab nga mapainom og tubig ug mabasa matag karon ug unya.
Samtang ang mga baka ug kanding o bisan gani ang mga baboy ug manok, kinahanglang dunay klarong kapasilongan aron dili mangaluya.
Isip kabahin sa El Niño plan sa probinsiya, ang Provincial Veterinarian’s Office namalit na og mga tambal, feeds ug supplements nga i-abag ngadto sa mga lokalidad sa higayon nga motumaw ug balik ang huwaw.
Kompiyansa si Vincoy nga mas makapangandam na ang mga namuhig hayupan ug ang mga local government unit aron dili usab makaangkon ug dakong kadaot ang ilang mga binuhi, sa higayon nga dunay talagsaong kainit sa panahon. Mahimo usab kini nga i-apply sa mga iring ug iro sa balay.