WALA madayon ang subling pagsira sa fly-over sa Tabunok, dakbayan sa Talisay nga gikatakda unta kagabii alang na sa hingpit ug kataposang pag-aspalto.
Hinuon giuswag kini karong Biyernes sa gabii.
Si Almond Dela Peña, kinsa maoy pangu sa City of Talisay-Traffic Operation Development Authority (CT-TODA), mipahibawo nga nitawag kaniya ang kontraktor sa maong proyekto ug ang mga opisyal sa Department of Public Works and Highways 2nd Engineering District aron ipaabot ang pag-uswag gumikan sa bati nga panahon.
Nipasalig ang kontraktor nga dili magdugay ang pag-repair sa maong fly-over basta lang maayo na ang dagan sa panahon.
Samtang ang South road Properties mao na sab unya ang mahimong kaagian sa mga pribado ug mga bus nga mopaingon sa dakbayan sa Sugbo ug paingon sa south.
Sama sa gihapon manakop ang iyang mga sakop niadtong mga makalapas sa lagda sa trapiko ug andam kini mo-isyu og Temporary Operator’s Permit (TOP).
Matod ni Dela Peña nga nakadakop sila og sobra sa 10 ka mga drayber nga nakalapas sa trapiko sa unang pagsira sa fly-over.