Trak, awto nagbangga sa Minglanilla; 1 patay | SunStar

Trak, awto nagbangga sa Minglanilla; 1 patay

Time to read
1 minute
Read so far

Trak, awto nagbangga sa Minglanilla; 1 patay

Friday, April 21, 2017

GRABENG kadaut sa lawas ug ulo ang hinungdan nga namatay diha-diha ang drayber sa usa ka awto nga nibangga sa ka trak de karga nga puno sa sinakong semento sa Brgy. Ward 1, Minglanilla kagahapon sa ala 1 sa kaadlawon.

Wa isalikway sa kapulisan nga nakainom si Orencio Villaver Taraya, 57, taga Brgy. Tungkop sa mao nga lungsod kay giingong nag-ikis-ikis na daan ang dagan niini sa South Road Properties (SRP) pa.

Ang trak de karga gipanag-iya sa Vic Enterprises ug gimaniho ni Alvin Samino, 32, taga bara­ngay Lahug, siyudad sa Sugbo.

Base sa pasiunang inbestigasyon sa Minglanilla Police Station, ang trak dekarga paingon sa dakbayan sa Sugbo samtang ang Toyota Vios (YGX 258) paingon sa habagatan.

Paghiabot sa lugar nga nahitaboan, ang awto nitipas sa pikas lane diin nagsubay ang trak nga niresulta sa bangga.

Tungod sa kakusog sa impact, ingon sa nalukot ang awto ug namatay diha-diha si Taraya.

Samtang sila si Samino uban sa iyang duha ka truck boy wa maunsa.

Si Samino bolontaryong nitahan sa kapulisan sa Minglanilla.

“Kusog kayo ang dagan niya unya gaikis-ikis. Naa may gauna daang trak de karga, siya maoy nakalikay, unya ako maglisod na man,”asoy ni Samino.

Human sa hitabo, nawagtangan nag-brake ang trak de karga ug di na malubag ang manobela hinungdan nga mipaingon sa pikas lane ug nibangga sa usa ka gate.

Sigun sa mga saksi nga didto pa lang daan sa SRP, nag-ikis-ikis na ang dagan sa awto ug hapit usab kini makabangga sa ubang mga sakyanan.

Si SPO2 Oliver Dacua sa Minglanilla Police station niingon nga ilang gitanggong si Samino tungod kay namatay si Taraya.

Kini bisan pa nga sa ilang inbestigasyon nilutaw nga sad-an si Taraya.

“Naara na sa mga tagtungod ug sa drayber sa trak de karga kon magsabot sila, depende na­na nila, ”matod ni Dacua.

Gipatik sa mantalaang Superbalita Cebu Abril 22, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments