GIAWHAG karon ang mga motorista ug driver sa pampubliko ug pribadong mga sakyanan sa Central Visayas nga moduso sa ilang mga suhestiyon ug rekomendasyon kalabot sa Anti-Distracted Driving Act, nga kasamtangan unang gisuspenso.
Samtang padayon usab ang pagpatuman sa Children’s Safety on Motorcyles Act, bisan pa man nga daghan usab ang nipadangat og reklamo batok niini.
Martes dihang niluwat og mando ang Department of Transportation (DOTr) nga ipahunong una ang pagpatuman sa ADDA diin gimandoan ang Land Transportation Office (LTO) nga dili una manakop karon nga tun-an pagbalik ang Implementing Rules and Regulations niii.
Kini subay sa daghang reklamo nga nadawat sa ahenisya, gani sa dili pa nila hingpit nga aprobahan ang amyendahan nga IRR, giawhag una nila ang publiko nga mohatag sa ilang mga komento, suhesityon ug ubang gusto nila kabahin sa maong balaod.
Gitug-an sa LTO 7 regional director Alita Pulga nga wala pa nila masuta kon kanus-a kini ipatuman pagbalik.
Matod niini nga posibleng aduna pay public hearing nga pagahimuon pag-usab.
Gibutyag usab sa director nga atol sa pagpatuman sa ADDA niadtong nakalabay nga Huwebes, aduna gyu’y usa nga taga dakabayan sa Sugbo ang nasampulan, diin nasakpang naggamit og tablet samtang nagmaneho.
Samtang ang Republic Act 10666 kun Children’s Safety on Motorcycles Act of 2015, magpadayon bisan pa man kon nakadawat usab sila og pipila ka mga reklamo niini.
Susama nalang sa mga anaa sa kabukiran, kinsa nihangyo nga tugutan lang ang pagpasakay og gagmay’ng bata diha sa motorsiklo, hilabi na nga nagsingabot ang pagbukas sa klase.
Gani usa si Cebu City Mayor Tomas Osmeña sa nanawagan nga hatagan unag kahigayonan ang mga bukirang barangay diin motor ang kasagarang gamit isip transportasyon.
Apan matod ni Pulga nga wala’y exception sa maong balaod.
Ang pwede mahimo sa LGU mao ang paghangyo sa Land Transportation and Franchising Board (LTFRB) nga butangan og rota sa jeep ang bukirang bahin aron matubag ang problema na unya niining paangkas og bata sa motor.
Sukad niadtong Biyernes hangtod kagahapon, niabot na sa walo ka mga motorista sa dakbayan sa Sugbo ang nasikop og nakamulta tungod sa kalapasan sa balaod.
Matod ni Joel Maloloy-on ang operations chief sa LTO 7 nga sagad sa ilang nadakpan kining hapon sa alas 5:00 pataas diin tingpanguli.
Sa 500 nga deputized agent nila sa tibuok rehiyon kapin gatusan niini ang naa sa Cebu City.