ANG 22 ka barangay kapitan sa dakbayan sa Talisay gimandoan ni Mayor Eduardo Gullas nga gamiton ang ilang 20 ka mga tanod alang na sa pag-bukas sa klase sugod karong adlawa.
Lakip sa iyang gimandoan ang hepe sa Talisay Police Station nga si P/Supt. Emerson Dante nga ipaalerto ang tanang pulis, ingon man mga sakop sa City of Talisay Traffic operations Development Authority (CT-TODA).
Nasayran karong adlawa mao na ang unang adlaw sa pag-abli na sa klase sa mga pampublikong tunghaan sa nasud.
Niadtong Biyernes, ang mayor nipatawag sa tanang mga kapitan ug hepe sa kapulisan CT-TODA ug kabomberohan og gituki ang ilang himuong pagpangandam aron mahimong hapsay ug malinawon ang pag-abli sa klase.
Matod ni Gullas nga dunay mga barangay sa Talisay nga dunay tunghaan sa elementarya ug high school, diin gigamit pa kini sa night classes.
Hinungdan nga iya kining gipangutana ang mga kapitan ingon man si Dante kon unsa ang ilang preparasyon.
Nagkanayon si Gullas nga iyang giingnan ang mga kapitan nga kinahanglan motunga ang 20 ka mga tanod sa matag barangay aron makatabang sa mga bata paingon sa tunghaan.