DRAYBER og Grab Car gireklamo sa iyang pasahero nga babaye nga nang-harass niini samtang luwan sa sakyanan niadtong gabii sa Hunyo 4, 2017.
Ang Land Transportation Franchising and Regulatory Board (LTFRB) sa Central Visayas nihatag og tulo ka adlaw sa Grab sa pagtubag sa pasangil sa pasahero nga si alyas Maria batok sa drayber sud sa tulo ka adlaw gikan sa pagdawat sa suwat nga pinetsahan og Hunyo 9, 2017.
Sa suwat, si LTFRB 7 regional director Ahmed Cuizon nangayo og tubag ni Raymond Dejan sa Grab Inc., nga naka-address sa usa ka hotel sa dan Escario, siyudad sa Sugbo sa reklamo batok sa usa sa mga drayber niini sa GrabCar.
Sa iyang usa ka pahina nga complaint affidavit, si Maria niasoy nga alas 9 sa gabii niadtong Hunyo 4, ang iyang higala nga babaye ni-book sa Grab App gikan sa siyudad sa Mandaue paingon sa Cebu South Bus Terminal aron siya ihatod.
Apan ang iyang higala ninaog dapit sa Carreta Elementary School ug si Maria na lang usa ang nahabilin sud sa awto kuyog sa drayber nga si alyas Luis.
Samtang nagdagan, nakig-estorya ang drayber ni Maria ug gihunong ang sakyanan sa ngitngit nga dapit duol sa Cebu Normal University (CNU).
Dinhi, nibalhin sa likod nga lingkuran si Luis ug nipaduol ni Maria ug gigunitan ang iyang kamot, dayon gigakos, gisaghidsaghid ang mga bukton sa dughan sa babaye ug gibutang ang kamot sa iyang sabakan.
Si Maria niasoy nga gihikap ug gihagkan usab ang iyang buhok ni Luis, gihikap ang iyang nawong, gihagkan ang iyang agtang, tuo ug walang aping.
Dihang giingnan niya ang drayber nga gipangita na siya sa iyang inahan nibalik sa driver's seat ang lalake ug nipadayon og dagan paingon sa CSBT.
Sa dihang naabot na sila sa CSBT, giingong wa ablihi ni Luis ang pultahan ug gipangutana si Maria kon gusto pa ba niini nga moadto og laing lugar.
Matod ni Maria nga gipugos usab siya ni Luis nga ihatag ang iyang number ug iya kini gituman gumikan sa kakapoy.
Siya nidugang si Luis nang-harass niya pinaagi sa text, tawag ug chat sa iyang messenger account.
Si Maria, gitabangan ni Atty. Roselo Alfar, volunteer sa Lawyers for Commuters' Safety and Protection - Cebu Chapter.
Ang sakyanan gipa-impound sa abogado sa LTFRB 7, Atty. Edwin Antepuesto, human masakpi nga colorum diay kini ug way Provisional Authority.
Matod ni Cuizon kinahanglan bayran sa tag-iya sa sakyanan ang multa nga P120,000 ug matanggong ang awto sud sa tulo ka buwan.
Ang drayber gitiketan usab sa sala nga “discourtesy,” nga dunay multa nga P5,000.
Si Cuizon nidasig sa reklamante nga mosang-at og kasong kriminal batok ni Luis ngadto sa piskaliya.
Ang direktor nidugang nga kini ang unang reklamo nga nadawat sa ilang buhatan.
Moabot sa 100 ka PA ang ilang naisyu sa Uber ug Grab dinhi sa rehiyon.