3 ka dapit sa lalawigan sa Sugbo gideklarar nga 'protected areas'

TULO ka mga dapit sa lala­wigan sa Sugbo ang dugang gideklarar isip marine protected areas.

Sa regular session niadtong Hunyo 5, ang Sangguniang Panlalawigan sa Sugbo nipalabang sa report sa Committee on Environmental Conservation and Natural Resources nga gipangulohan ni Provincial Board Member Thadeo Jovito Ouano nga nagtugot sa pagdeklarar sa habagatang bahin sa Marikaban ug Hilantagaan ingon man sa sidlakang bahin sa Barangay Talisay isip MPAs.

Si Baltazar Tribunalo, officer-in-charge sa Provincial Environment and Natural Resources Office (Penro), nii­ngon nga pinaagi sa deklarasyon nga mahimong MPA ang bahin sa dagat sa usa ka dapit makahatag kini og kahigayo­nan sa mga isda nga makapadaghan ug mapalambo ang mga gasang.

Matod niya nga nagtinguha ang kagamhanan sa lalawigan sa Sugbo nga dugang mga dapit sa Sugbo ang mahimo nga MPAs.

Kini nagpasabot nga mapa­nalipdan ang mga kinabuhi ilawom sa dagat nga sakop sa MPA labi na ang mga isda ug corals.

Si Tribunalo namahayag ang usa sa mga bentaha sa deklarasyon makahatag kini og seguridad sa pagkaon nga makuha gikan sa kadagatan.

“Naay disadvantage sa mga hakog ug mapahimuslanon sa kinaiyahan ug kadagatan labi na ang mga commercial fishers,” pahayag sa OIC sa Penro.

Siya nidugang makadisbentaha kini sa gagmay nga mga mananagat nga nagsalig sa pagpanagat dihang lugara sanglit dili na sila kakuha og isda.

Apan, gitino ni Baltazar, mas daghan ang bentaha kon madeklarar isip MPA ang usa ka dapit.

Ubos sa Republic Act 7586 kun National Integrated Protected Areas System Act of 1992 ang mga MPA ubos sa pagdumala ug pag-atiman sa Protected Areas and Wildlife Division sa Department of Environment and Natural Resources. /SCG