DRUG pusher nga usa usab ka pugante napatay sa pinusilay tali sa kapulisan sa Barangay Dayhagin, Medellin, amihanang Sugbo kagahapon sa alas 6 sa buntag.
Mga pulis sa Provincial Intelligence Branch (PIB) pinangulohan ni Supt. Joie Yape Jr., niila sa suspek nga si Kim Flores Imbento.
Si Imbento, kinsa usa usab ka pugante ug pinangita, giingong unang namusil kanila hinungdan nga ilang gibaslan.
Siya ang number 3 nga most wanted sa kapulisan sa lalawigan sa Sugbo.
Ang mga pulis nipatuman sa warrant of arrest sa kasong pagpamaligya og illegal drugs nga giisyu ni Bogo City Regional Trial Court Branch 61 Judge Antonio Marigomen, dihang nahitabo ang pinusilay.
Matod ni Yape nga dihang nakabantay sa ilang pag-abot, giingong namusil gilayon si Imbento.
Si Imbento daling gidala sa usa ka pampublikong tambalanan, apan gideklarar nga patay mga alas 7:20 sa buntag.
Nakakuha ang kapulisan og daghang mga armas nga naglakip sa duha ka kalibre .45 nga pistola, usa ka KG9 submachine pistol, .357 caliber revolver og usa ka 9mm black widow.
Duha ka mga sachet sa gidudahang shabu ang napalgang gihuptan ni Imbento.
Ang suspek giingong usa ka gun-for-hire ug nakaeskapo gikan sa Medellin District Jail uban sa laing tulo ka mga piniriso niadtong Oktubre 21, 2015.
Iyang mga kauban mao sila si Rene Benaro Solon, Alvic Arrabis Inot, ug Joselito Pantaleon.
Sila si Inot ug Pantaleon nasikop pipila ka mga oras human sila makaeskapo.
Matod ni Yape nga si Imbento high-value target ug usa ka sakop sa grupo sa mga kriminal.