Negosyante mitanyag nga magtukod og condo sa mga kabus sa Talisay

USA ka Insek nga magpapatigayon buot magtukod og medium-rise condominium alang sa informal settlers sa sa dakbayan sa Talisay.

Si ShengYun nakigtagbo ni Mayor Eduardo Gullas niadtong Miyerkules sa gabii ug nitanyag kini sa mayo alang sa maong proyekto.

Ang maong magpapatiga­yon nagplano nga mo­tukod og 19 ka four-story-type building, diin matag building maka-accommodate og 48 ka pamilya sanglit dose na ka pamilya matag floor.

Gibutyag ni Gullas nga ma­tag unit adunay floor area nga 28 square meters, nga mokantidad og 395,000, ug impason kini sulod sa 40 ka tuig.

Ang matag beneficiary mag­bayad lang og tag 1,600 ma­tag buwan.

Matod ni Gullas, ang maong magpapatigayon nagkinahanglan lang og 2.5 ka ektaryang luna diha sa Talisay.

Hinungdan nga ang siyudad mitumbok sa Sitio Salavador, Barangay Tanke nga adunay gidak-on nga 1.8 ka esktarya nga iya sa siyudad.

Samtang, ang tupad nga luna nga adunay gidak-on nga 700 square meters, iya sa nasudnong kagamhanan.

Nagkanayon si Gullas nga kon magkasinabot ang Chinese investors, misaad nga ilang humanon ang pagtukod sa 19 ka building nga sulod lang sa usa ka tuig ug itukod kini phase by phase.

Hinuon, mopahigayon pag public hearing ang local nga kagamhanan alang niini.

Si Rosali Autor, pangulo sa Local Housing Board, niingon nga dako na kinig matabang sa informal settlers diha sa ilang siyudad sanglit moabot sa 952 pamilya apan 279 ka informal settlers ang mapahi­luan sa condo.