Uyoan ni Jaguar patay | SunStar

Uyoan ni Jaguar patay

Time to read
less than
1 minute
Read so far

Uyoan ni Jaguar patay

Sunday, June 18, 2017

UYOAN ni anhing drug lord Jeffrey "Jaguar" Diaz napa­tay sa shootout niadtong Sabado sa gabii tali sa kapulisan nga nihimo sa buy-bust sa Barangay Balirong, City of Naga.

Si Edgar Diaz Lampaog namatay samtang gidala kini sa Minglanilla District Hospital tungod sa daghang igo niini sa bala sa armas.

Nianang alas 7:30 sa gabii sa maong adlaw, ang mga pulis ubos sa pagpangulo ni Police Supt. Gregorio Galsim nilusad sa operasyon batok kang Lampaog, kinsa giila sa kapulisan nga high value target.

Ang kapulisan nihimo sa buy-bust operation gawas sa balay ni Lampaog dihang ang suspek nakamatikod nga ang ilang gikasabot usa ka pulis.

Si Lampaog nibunot da­yon og .38 caliber pistol ug namusil sa kapulisan apan nakabawos ang awtoridad.

Human sa shootout, si Glenn Cabunillas, kinsa kauban ni Lampaog, nasikop.

Laing diha sa dapit apan nakaipsot mao si Kevin Chavez, sumala sa kapulisan.

Nakuha sa kapulisan ang .38 caliber pistol, .45 caliber pistol ug hand grenade sa posisyon ni Lampaog.

Lakip sa nakuha mao ang duha ka dagkong pakete ug duha ka gagmay nga pakete nga gituhoang shabu.

Sa linaling pakighinabi, si Galsim niingon nga si Lampaog gikataho nga nihimo sa iyang operasyon naa sa provincial level.

Apan si Lampaog kanuna makaikyas sa kapulisan human magsige og balhin sa pagpuyo o base.

Si Galsim niinon nga sila nagplano tali sa ubang intelligence units sa pagsuta kon asa na naabot ang operasyon ni Lampaog. /JKV sa SunStar Cebu

Gipatik sa mantalaang Superbalita Cebu Hunyo 19, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments