55 ka balay gi-demolish | SunStar

55 ka balay gi-demolish

Time to read
less than
1 minute
Read so far

55 ka balay gi-demolish

Monday, June 19, 2017

MOKABAT ngadto sa 55 ka mga balay ang giguba sa taga Housing and Urban Development Office (HUDO) duol sa may Tribunal Creek, Brgy. Centro, dakbayan sa Mandaue kagahapon sa buntag.

Matod ni Cesar Ylanan, administrative aide III sa HUDO kinsa maoy nangulo sa operas­yon, nga malinawon ra hinuon ang demolisyon nga nagsugod pasado alas 8 sa buntag.

Dugang ni Ylanan nga sa pag-abot sa 27 ka miyembro sa demolition team, naghinahinay na og pangguba sa ilang mga balay ang mga residente sa dapit.

Usa sa naapektuhan sa demolisyon mao ang barangay kagawad nga si Eugene Ruiz nga boluntaryong niguba sa iyang balay.

Nasuta ning mantalaan nga 2011 pa gipahibawo ang mga residente sa dapit nga papahawon sila tungod sa kapeligro niini kon motaas ang tubig panahon sa kusog nga uwan.

“Mo-overflow man gud na ang tubig sa dapit kon mouwan,” ni Ylanan.

Saysay niya nga sa wa pa gihimo ang demolisyon, gipaubos una og tulo ka hugna sa konsultasyon ang mga re­sidente sa dapit.

Niadtong Hunyo 16, nihimo ang taga HUDO og pre-demolition conference aron mapahibaw ang mga residente sa unsay angay buhaton human sa demolisyon.

Gipatik sa mantalaang Superbalita Cebu Hunyo 20, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments