Habol nga napalgan mao ang putos sa lawas sa mayor? | SunStar

Habol nga napalgan mao ang putos sa lawas sa mayor?

Time to read
1 minute
Read so far

Habol nga napalgan mao ang putos sa lawas sa mayor?

Monday, June 19, 2017

HABOL nga gituohang gi­putos sa lawas ni Bien Unido Mayor Gisela Bendong-Boniel nakuha sa mga diver sa nagpadayong search and retrieval operation sa mga sakop sa Lapu-Lapu City Police Office sa Olango channel, kagahapon sa hapon.

Gihulagway ni PCI Junel Caadlawon, hepe sa operation sa LCPO, nga lagom nga habol nga adunay buslot o lungag ang nakuha gikan sa 36 metros nga gilawmon sa dagat nga gitung-an sa Caubian islet ug Olango island.

Matod pa ni Caadlawon nga ilang dad-on ang printed nga habol ngadto sa PNP crime laboratory aron sa pagsusi kon motukma kini sa habol nga giingong maoy gibukot sa lawas ni Mayor Gisela sa dihang gidayungan aron isakay sa pumpboat niadtong Hunyo 7 sa kadlawon.

Dili na maklaro kon adunay lama sa dugo o kon hugaw lang ang habol ilabi na nga nahumol kini sa dagat.

Kagahapon ang ika-10 na nga adlaw sa search dive alang kang Mayor Gisela nga gisalmutan sa walo ka mga diver.

Gigamitan gihapon og side-scan sonar nga iya sa Philippine Navy ang operasyon.

Samtang driver ni Bohol Provincial Board Member Niño Rey Boniel, bana sa mayor, nga si Edgar Tapere nitahan sa Police Regional Office 7 human siya gitumbok nga person of interest sa kamatayon ni Mayor Gisela.

Una nang nasubay sa Regional Intelligence Division pinaagi sa CCTV video ang pag abot ni Niño Rey sa Punta Engaño niadtong buntag sa Hunyo 7.

Nisakay dayon siya sa usa ka motorsiklo nga gituohan nga si Edgar Tapere ang driver dala pa ang bag sa mayor.

Sunod nga video ang pag agi niini sa Mactan bridge paingon sa syudad sa Mandaue ug ang pagsulod niini sa Monterrazas.

Tungod sa maong mga video nga nakuha sa kapulisan siya ang gisunod nga gipangita apan giingong wala na kini mopauli sa ilang panimay.

Sa pagkutlo ning balita naa pa kini sa kustodiya sa Regional Special Operations Group 7 human gipaubos sa imbestigasyon.

Samtang duha ka mga staff ni Niño Rey nanghimakak nga duna silay kalambigitan sa kamatayon sa mayor.

Sa buhatan ni manlalaban Ino­cencio de la Cerna, sila si Wilson Hoylar, human resource officer; ug personal assistant nga si Brian Sayson, nanghimakak nga duna silay kalambigitan sa kamatayon sa mayor.

Matod ni Hoylar nga duna siyay dakong utang kabubut-on sa mayor.

Gipatik sa mantalaang Superbalita Cebu Hunyo 20, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments