US, Phil. Navy mihimo og hiniusang training | SunStar

US, Phil. Navy mihimo og hiniusang training

Time to read
1 minute
Read so far

US, Phil. Navy mihimo og hiniusang training

Monday, June 19, 2017

NAGPADAYONG hiniusang Maritime Training Activity Sama Sama sa U.S. ug Philippine Navy sa Sugbo way kalabutan sa kagubot sa Marawi City.

Labing unang higayon nga ang Maritime Training nga gihimo sa Sugbo nga gisugdan kagahapon ug motapos sa Hunyo 25.

Giklaro ni Navy Lt. Randy Garbo, commanding officer sa Civil Military Operations Unit – Central nga niadto pang buwan sa Abril giplano ang maong kalihokan nga wa pa moulbo ang kagubot didto sa Marawi City nga gipasiugdahan sa Maute group.

Matod ni Garbo nga matag tuig ipahigayon ang maong Maritime Training Sama Sama sa katuyoan nga mapalig-on ang pakig-alayon tali sa mga sakop sa U.S. ug Philippine Navy, ilabi sa pagpatuman sa seguridad sa kadagatan.

Ang ehersisyo magtutok sa “mutual security concerns” nga nakaapekto sa kadagatan sa Pilipinas sama sa mga pirata ug sea smuggling, ang pagpatuman sa maritime domain awareness lakip na ang pagpatrolya, humanitarian assistance ug disaster relief preparedness.

Gamiton sa maong training ang 3,000 gross tonnage nga littoral combat ship USS Coronado (LCS 4) nga kasamtangan nga gidunggo sa Cebu International Port.
Samtang, moapil ang BRP Gregorio del Pilar sa Philippine Navy.

“Maritime Training Activity Sama Sama is an ideal framework to strengthen our relationship with our partners in the Philippine Navy and to enhance readiness through training and evolutions ashore and at sea,” matod ni Capt. Alexis Walker, commodore, Destro­yer Squadron 7.

Kabahin sa kalihokan ang media tour diin gihatagan og higayon ang mga sakop sa Cebu Media nga makasulod sa USS Coronado diin makita ang ilang modernong armas ug karga niini nga Sikorsky SH-60 Seahawk helicopter ug laing duha ka MQ-8 Fire Scout (unmanned autonomous helicopter).

Gibanabana nga moabot ngadto sa 200 ka mga sakop sa U.S. Navy ug Philippine Navy ang ningsalmot sa maong pagbansay sa kadagatan sa Bohol.

Gipatik sa mantalaang Superbalita Cebu Hunyo 20, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments