KAHIMTANG sa Talisay Police Station gisusi sa mga sakop sa Police Human Rights Affairs Office (PHRAO) sa Camp Crame.
Kini gitumong aron masuta kon wala ba malapas ang katungod sa mga binilanggo.
Si Supt. Joel Usman, pangulo sa PHRAO, niingon nga ilang giuna ang Talisay Police Station human nila makita sa record nga mas taas og 55 porsiyento ang ilang gidaghanon sa mga piniriso.
Iyang gipasabot nga kon daghan ang mga piniriso ug maghuot kini, posibleng mangasakit tungod kay dili na maayo ang ilang kahmtang ingon man ang pagkatulog.
Gawas pa, diha na motunga ang pagduda nga nalapas ang katungod sa mga piniriso.
Lakip sa ilang gisusi kon wala bay sekretong prisohan ang Talisay Police Station nga dali nga giklaro sa Talisay Police Station nga wala sila ninang seretong prisohan.
Gitambagan si Supt. Usman ang mga pulis nga aron malikayan nga maghuot ang prisohan mas maayong kanunayng makig-coordinate sa mga trial court aron paspas ang paglihok sa kaso ug mabalhin dayon ang mga piniriso ngadto sa municipal jail o ba kaha city jail.
Gipasabot ni Sr. Insp. Albert Quilotorio, deputy chief sa Talisay City Police Station, nga ang hinungdan nga mag-abot ang ilang mga piniriso tungod usab sa subsob nilang kampanya batok sa illegal nga drugas. (DRT)