TALANDUGON ang kahimtang sa usa ka suspek sa pagpatay human kini gipusil samtang natug sa nakaparada nga PUJ pasado alas 6 sa gabii niadtong Martes sa dalan C. Padilla, Barangay Duljo Fatima, dakbayan sa Sugbo.
Ang biktima bag-o lang nakagawas human makapyansa sa kaso nga gipasaka batok kaniya.
Ang biktima nga gipusil tumong sa ulo giilang si Joseph Nolasco, 48, nagpuyo sa nahisgutang dapit.
Sa pasiuna nga inbestigasyon ni SPO2 Rommel Bancog ug mga kauban sa Homicide Section sa Cebu City Police Office, nagbutyag nga natulog si Nolasco ug gisaka sa wa pa mailhi nga tawo ug dayon gipusil.
Matod pa ni Dorothy Castañeda, pag-umangkon ni Nolasco, nga daling mikanaug sa PUJ ang gunman ug nisibat.
Dugang nasayran ni Bancog nga si Nolasco gitumbok nga maoy nidunggab patay kang Jeffrey Llanos niadtong Septiyembre sa miaging tuig.
Napasakaan og kaso nga murder si Nolasco apan gi down grade sa korte ngadto sa homicide hinungdan nga nakapyansa.
Paggawas ni Nolasco sa bilanggoan, gipahimangnoan siya sa iyang mga kabanay nga di mopakita ug mobalik sa dapit kay nasuko ang kabanay ni Llanos.
Apan wa siya naminaw sa tambag, nibalik sa dapit ug nanghugas sa mga puj nga nakaparada sa gas station sa dapit.
Panimawos maoy gitan-aw nga motibo sa kapulisan. (JFT)