DUHA ka mga high value target nga kawani sa Lapu-Lapu City Hall ang nasikop sa duha ka managlahing mga buy-bust operation sa kapulisan sa dakbayan sa Mandaue sa Brgy. Looc, sa dakbayan niadtong Martes sa gabii.
Ang mga suspek nga giingong mag-agaw giila nga sila si Gallego Gomez, 42, taga Felicitas Village, Looc ug kasamtangang kawani isip special agent 1 sa City Administrator’s Office ug si Roberto Gomez, 47, taga Sitio Baybayon, Looc, Mandaue city, admin aid sa ABC Department sa Lapu-Lapu City Hall.
Apan giklaro ni Mayor Paz Radaza nga di na konektado ang duha ka mga suspek sa city hall human wa na gi-renew ang ilang kontrata sa city hall.
Nasuta ning mantalaan nga expire na ang kontrata sa duha.
Unang nasikop sa kapulisan mao si Gallego uban sa usa ka Edilberto Lumontad, 48, taga Filicitas Village sa maong dapit mga alas 6:15 sa gabii.
Si Gallego ug Lumontad nakuhaan og tag-usa ka pakete sa gituohang shabu ug uban pang mga drug paraphernalia.
Human sa kapin duha ka oras, nasikop usab si Roberto sa Sitio baybayon uban sa usa ka Philip Noval, 35, ug Angelo Florez, 22, parehong taga taga Sitio Dela Paz, Looc, Mandaue City.
Nakuha gikan ni Roberto mao ang tulo ka gagmayng pakete sa gituohang shabu ug usa ka pakete nga maoy subject of sale sa maong operasyon.
Si Noval, sa laing bahin, nakuhaan og laing usa ka pakete sa gituohang shabu ug uban pang mga drug paraphernalia.
Ang mga suspek kinsa kasamtangang gibalhug sa Station 5 sa Mandaue City Police Office gikatakdang mag-atubang og kasong may kalapasan sa paghupot ug pagpamaligya og iligal nga drugas. (JPP)