BRT miagi na og taas nga proseso samtang LRT, bisan papel, wa: mayor

DAW sama sa duha ka mga teenager nga nagpalabwa­nay kon si kinsa ang gwapa sa ilang mga uyab ang sitwasyon karon sa Bus Rapid Transit ug Light Rail Transit sa dakbayan sa Sugbo.

Kini ang paghulagway ni Mayor Tomas Osmeña, kinsa niduso sa BRT ug ang pagduso usab ni Secretary Michael Dino sa LRT para pagsulbad sa problema sa trapiko sa siyudad ug sa Metro Cebu.

“Naay duha ka teenager naghambogay sila. Bai, my girlfriend is very pretty. The other guy said, my girlfriend is prettier. Where is your girlfriend? My girlfriend? Here she is BRT. You, who is your girfriend? Here she is, LRT. Uy, drawing ra man na,”paghulagway ni Osmeña.

Ang mayor nibutyag nga niagi na sa makuti nga proseso ang BRT gikan sa feasibility study, pagpangita og pundo, pagpangayo og pagtugot sa National Economic Development Authority ug uban pa samtang ang LRT wa pa makasugod bisan usa.

Si Osmeña nipasangil kang Dino nga maoy nagmaniubra aron ang BRT supakon sa mga tawo.

Una niini, si Engr. Rene Santiago, kinsa eksperto sa transportasyon niingon nga mausik ra ang binilyon nga gasto sa BRT ug mahisama kini sa Hanoi sa Vietnam sanglit gagmay ang karsada sa siyudad.

Mao sab ang panahom ni kanhi mayor Alvin Garcia, Kenneth Cobonpue, chairman sa Regional Development Council ug ubang mga local government unit kinsa niuyon sa LRT.

Si Osmeña niingon nga ma­mahimo siyang bias sa iyang pasangil ngadto kang Dino apan matod pa sa mayor nga maila sa linihokan sa alter ego ni Presidente Rodrigo Duterte.

Si Dino, sa iyang bahin, ni­ingon nga ang iyang buhatan gitahasan sa pagmonitor sa mga proyekto ug programa sa Visayas.

Matod pa ni Dino nga nilampos ang BRT sa ubang lugar apan wa ipahibawo sa tagdumala sa BRT nga napakyas kini sa laing dapit.

Iyang irekomendar ngadto sa Malacanang ang pag-review o pag-imbestigar kabahin sa implementasyon sa BRT. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph