Abangan sa mga stall pasakahan | SunStar

Abangan sa mga stall pasakahan

Time to read
1 minute
Read so far

Abangan sa mga stall pasakahan

Sunday, July 16, 2017

GISUPAK sa mga vendor ang tinguha sa Cebu City Government nga pausbawan og 1000 porsiyento ang ilang abangan matag adlaw.

Si Konsehal Alvin Arcilla niduso og balaudnon nga magpataas sa abangan sa mga stall sa Carbon Complex ug mga satellite market sanglit ang ilang gisunod nga ordinansa niadto pang tuig 1993.

Ang pangulo sa Cebu Market Vendors Development Cooperative (Cemvedco) nga si Chairman Erwin Gok-ong Sr., nagkanayon nga tinuod 23 ka tuig na nga tag P5 ang ilang abang matag metro kwadrado sa mga stall nga ilang gigamit apan gidak-an ra sila sa 1000 porsiyento nga usbaw.

Matod ni Gok-ong Sr. nga mosugot ug andam silang mo­bayad kon adunay increase nga ipatuman apan di lang sa maong gidak-on.

Atol sa pag-atubang ni Gok-ong Sr. sa konseho alang sa gipahibayon nga public hearing ilang giawhag ug gipahinumdoman ang mga opisyal nga ang merkado gitukod alang pagserbisyo sa katawhan ug di para mokita og minilyon ang siyudad.

Dugang niya niya nga ang o­­­pe­­rasyon sa merkado wa nagsalig sa pundo gikan sa City Go­­vernment sanglit ma­kabarog ang merkado sa ilang kauga­lingon nga kasamta­ngang kita.

Gilakbitan usab sa chairman sa Cemvedco nga gituyo pag-umol ni Mayor Tomas Osmena ang South Road Properties aron mokita og dako ang siyudad ug di mabug-atan ang pagbayad ang mga Sugbuanon sa buhis.

Si Arcilla, chairman sa committee on markets unang nipalabang og ordinansa niadtong tuig 2014 nga mag-usbaw og 500 porsiyento sa rental rate gikan sa tag P5 per square meter apan sama sa gihapon gisupak kini sa mga vendor.

Ang rental rate sa merkado sa dakbayan sa Sugbo maoy la­bing ubos nga abang sa mga mer­kado nga gipadagan sa usa ka local government unit. (PAC)

Gipatik sa mantalaang Superbalita Cebu Hulyo 17, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments