NATIONAL Bureau of Investigation (NBI) 7 nisikop sa laing suspek sa pagtulis ug pagpatay sa 25-anyos nga call center agent sa brgy. Pulangbato, dakbayan sa Sugbo.
Gipasakaan na kini og kasong robbery with homicide ngadto sa Cebu City Prosecutor’s Office human positibo nga giila sa usa ka saksi nga maoy nagmaneho sa motorsiklo nga giluwanan sa biktima niadtong Hulyo 9 sa gabii.
Napalgang patay si Aireen Adolfo, kinsa dili na halos mailhan ang nawong human matod pa gidakdakan og bato ug gibiyaan nga wa nay kinabuhi sa usa ka bakanteng luna sa Brgy. Pulangbato.
Gawas sa imbestigasyon sa kapulisan nga nakasikop og duha ka mga suspek, usa niini gibuhian, nihimo og parallel nga imbestigasyon ang NBI 7 human nidangop sa ilang buhatan si Leah Adolfo, inahan ni Aireen.
Sa gihimo nga imbestigasyon sa NBI ug sa mga ebedensya nga ilang nakuha, nigawas ang ngan sa habal-habal driver nga si Francisco Capalaran, Jr., alyas Digo.
Sigun sa usa ka saksi, iyang nakit-an si Capalaran nga nibiyahe niadtong Hulyo 9 sa gabii gikan sa Brgy. Pit-os, paingon sa direksiyon sa Pulangbato.
Duna kini sakay nga babaye, kinsang nawong wa niya maklaro, apan iyang nakita nga nagdala og mga kinompra ug blue usab ang color sa short pants nga gisuot niini.
Nitakdo kini sa gisuot ni Aireen dihang siya nakaplagan.
Si NBI 7 special investigator, Arnel Pura, nitug-an nga alas 4 sa hapon niadtong Huwebes (Hulyo 13), giadto nila ang pinuy-anan ni Capalaran ug ila kining nasikop. Ilang nabantayan nga duna kini gagmay nga mga samad nga posibleng mugna sa pagsukol ni Aireen kaniya.
Nakuha sab sa NBI 7 ang sapot nga gisuot sa suspek dihang nahitabo ang krimen. Nalabhan na kini apan giingong dunay mga lama sa dugo hinungdan nga ipadala nila sa NBI Central Office alang sa forensic examination.
Ang jacket nga dunay stripe nga gisuot ni Caraan positibo nga gitumbok sa saksi nga maoy iyang nakita dihang iya kining nakit-ang namasahero niadtong Hulyo 9 sa gabii.
Natukma usab kini sa kuha sa close circuit television (CCTV) footage nga nakuha sa NBI.
Reklamong robbery with homicide ang giduso sa NBI 7 ngadto sa Cebu City Prosecutor’s Office batok ni Capalaran, kinsa minyo ug dunay tulo ka mga anak.
Gidugangan pa kini og kalapasan sa Sec. 11, 14 ug 15 sa Dangerous Drugs Act human siya makuhai og usa ka pakete sa gidudahang shabu nga gibutang sa jacket sa iyang driver’s license.
Gihimakak ni Capalaran ang iyang kalambigitan sa pagpatay ni Aireen.
Matod niya wa siya moabiyahe niadtong Hulyo 9 sa gabii.
Giangkon hinuon niya nga tigamitan siya ug illegal nga drugas.
Duna pay ubang saksi nga nisaysay sa mga panghitabo sa wa pa gikatahong nawala si Aireen, sama na sa pagkanaog gikan sa jeep nga iyang gisakyan gikan sa usa ka mall sa Talamban hangtud na sa pagsakay niini og habal-habal sa Pit-os aron unta mopauli sa Pulangbato. (AZDL)