GIANGKON sa mga kawani Pantawid Pamilyang Pilipino Program (4P’s) sa siyudad sa Naga nga aduna gyud silay gihimong mga pamaagi aron mapugos ang ilang mga miyembro sa pagpalit og bugas ngadto sa usa ka negusyante mamaligyay'g nga gusto nilang papalitan.
Apan dali usab nilang giklaro nga kagahapon atol sa pagpanghatag sa rice subsidy alang na karong buwana wala na kini nila buhata.
Una migawas ang report nga adunay mga kawani sa Department of Social Welfare and Services (DSWS) nga mopugos sa mga sakop sa 4Ps nga adto mopalit og bugas sa ilang kontak sa higayon nga manghatag sila og rice subsidy.
Ang pangulo sa DSWS sa Naga nga si Maria Gabato miingon nga lahi ang ilang buhatan sanglit aduna man gyuy kaugalingong opisina ang 4Ps diha sa Naga nga direkta sa ilang rehiyonal nga buhatan.
Matod ni Gabato nga aduna usab silay baligya nga bugas nga gitawag og Bigasan sa Barangay apan miklaro nga wala silay pagpamugos nga gihimo.
Matag buwan ang mga sakop sa 4Ps adunay madawat nga tag P600 ug ihatag kini matag duha ka buwan.
Si Director Maria Evelyn Macapobre mipasidaan sa iyang mga sakop nga dili buhaton ang pagpamugos aron dili makiha ug ipailawom sa imbestigasyon.
Ang usa sa mga opisyal sa 4Ps sa Naga kinsa nihangyo nga dili lang magpaila miangkon nga sa miaging buwan nga pagpanghatag aduna silay stub nga gihatag aron mapugos ang mga sakop niini sa pagpalit og bugas ngadto sa ila ra usab nga mga sakop nga nagnegosyo og bugas.
Kini ilang gihimo human nila mabantayi nga adunay miyembro sa 4Ps ang dili ipalit og bugas ang kuwarta sanglit gamiton kini sa laing nga katuyoan.
“Usahay ang resibo bisan og P600 balig P200 nalang niini ang sa bugas. Ang uban maghimog minao-mao nga resibo,” matod sa tinubdan.
Apan gumikan sa kontrobersiya human pipila ka mga sakop ang nangreklamo, ila nalang kining gihunong ug gani kagahapon atol sa pagpanghatag sa rice subsidy karong buwana ila nalang nga gipasagdan ang mga sakop kon asa kini mopalit og bugas.
Giklaro sa DSWS nga ang P600 gitumong aron sa pagpalit og bugas sanglit lahi man usab ang P500 matag buwan alang sa edukasyon ug P300 alang sa tambal.