NADAKPAN na ang piniriso sa New City Jail nga nieskapo niadtong Lunes sa kaadlawon sa balay sa iyang higala sa Barangay Suba, dakbayan sa Sugbo.
Apan di ang mga pulis o personnel sa Bureau of Jail Management and Penology (BJMP-7) ang nakadakop kang Marvin Gimpeso, 32, kon di si Konsehal Dave Tumulak, deputy mayor on police matter ug chairman sa public order and safety.
Matod pa ni Tumulak nga dihang naabot siya sa balay nga giabtan ni Gimpeso, natulog pa kini ug gipukaw na kini sa tagbalay.
Hinuon wa mosukol o moeskapo dihang naabot ang konsehal.
Sa pag-interbyu ni Tumulak kang Gimpeso sulod sa sakyanan, diin gi-post sa konsehal sa iyang Facebook account.
Gitug-an ni Gimpeso nga napugos siya og eskapo gumikan sa di niya maagwanta nga pagbun-og kaniya sa mga jail officer, gipakinto siya og duha ka oras, gibartolina kauban ang mga inmate nga masakiton ug ang mga pagkaon hilaw sama sa isda ug rice.
Apan ang mga opisyal sa BJMP ni-deny sa pasangil ni Gimpeso.
Matod pa sa konsehal iyang giawhag ang Commission on Human Rights sa paglusad og imbestigasyon sa pasangil sa pugante. (PAC)