BARANGAY konsehal gisikop human nakuhaag armas dihang gikulata ang iyang asawa niadtong Martes sa buntag sa Brgy. Vito, lungsod sa Balamban, Sugbo.
Gidili sa balaod ang pagngan sa mga tawo nga nalambigit sa domestic violence.
Ang konsehal gipusasan human giingong gikulata niya ang iyang asawa, kinsa nakaangkon og mga bun-og sa kalawasan.
Ang konsehal nakuhaan og usa ka kalibre .45 nga pistola nga dunay pito ka mga bala sa magazine nga way lisensiya.
Si Sr. Insp. Ramil Morpos, hepe sa Balamban Police Station, nagkanayon ngadto sa Superbalita Cebu nga ang silingan sa magtiayon ang nitawag sa kapulisan.
Matod ni Morpos nga kanunay kulatahon sa konsehal ang iyang asawa sa panahon nga mag away.
Dihang gikulata na usab sa konsehal, dali nga nitawag sa kapulisan si Prigo ug naabtan sa akto sa mga pulis nga gikulata niini ang asawa.
Naaktuhan sab siya nga nagbitbit sa iyang armas hinungdan nga duha ka kaso ang atubangon sa konsehal- illegal possession of firearm ug kasong violence against women and children.
Si Morpos niingon nga battered wife ang ginang. (GPL)