GIPUSIL-PATAY ang messenger sa usa ka medical insurance company sa eskina Osmeña Boulevard ug dan M.P Yap, dakbayan sa Sugbo, pasado alas 3:00 sa hapon kagahapon.
Samdan sa iyang dughan mao si Mamerto Relacion, 48, taga Sityo Upper Torre, Barangay Inayawan.
Ang suspek nga security guard nga si Michael Manatad, taga Barangay Ermita, nitahan kagahapon sa kapulisan.
Matod ni SPO1 Winston Ybanez sa Homibide Section, gikan sa lakaw ang Relacion ug paingon sa opisina apan gisugat ni Manatad ug gipusil. Nisibat si Manatad sakay sa biseklita.
Samtang,nangalungag ang helmet nga gisul-ob sa biktima sa pagpamusil sa luyo sa Lapu-Lapu City Hall sa miaging Huwebes sa dihang gibanosbanosan og pusil sa duha ka wa mailhing lalake nga riding in tandem.
Nahipos sa kapulisan ang 23 ka basiyo ug pito ka slug nga mga bala sa .45 ug 9MM caliber pistol gikan sa dapit diin nahagba ang biktima samtang luwan sa iyang motorsiklo.
Giila ni SPO1 Luisito Ernie, inbestigador sa Homicide Section, ang namatay nga si Pinto Tambilawan Calil, 40, taga-Sityo Iba, Baran gay Basak.
Nasayran nga gikan pa sa buhatan sa traffic police, city police headquarters si Calil uban sa iyang misis nga niangkas sa motorsiklo alang sa settlement sa nahitabong vehicular accident ngadto sa biktima tali sa iyang gikakontra.
Sa ilang pagpauli niadtong Huwebes ,pasado 1:00 sa hapon sa dihang misubay na sa Sangi Road, barangay Pajo duha ka mga lalake ang miduol ni Calil dayon tira resulta sa pagkatumba sa biktima uban sa iyang misis.
Gibutyag ni SP01 Lydo Pinos nga gisinyasan og ayawg saba dayon gipadagan sa gunmen ang asawa ni Calil kinsa nagpaninggit og tabang samtang gitiwasan og pusil ang iyang bana nga nabuy-od sa kalsada.
Sa ulo ug bukobuko maoy sagad samad pinusilan nga naangkon sa biktima. (JFT/FVQ)