110 ka banyera sa isdang pinabuthan nasakmit; 3 ka barko nga nagkarga ang gipangsakmit | SunStar

110 ka banyera sa isdang pinabuthan nasakmit; 3 ka barko nga nagkarga ang gipangsakmit

Time to read
less than
1 minute
Read so far

110 ka banyera sa isdang pinabuthan nasakmit; 3 ka barko nga nagkarga ang gipangsakmit

Saturday, August 12, 2017

KAPIN sa 100 ka banyera sa isda ang nasakmit sa kapulisan ug Bantay Dagat Task Force sa lungsod sa Bantayan human tulo ka mga barko ang naatlan nga ilegal nga nangisda.

Giingon nga pinabuthan ang 110 ka banyera sa isda nga nasakmit sa awtoridad diin nagkantidad og P55,000 sa kada­gatan sa Barangay Hilotongan, Bantayan, isla sa Bantayan.

Nahitabo kini niadtong Huwebes sa buntag diin niabot usab sa walo ang nasikop, lakip ang mga mananagat, kapitan ug tag-iya sa mga barko.

Tulo ka mga barko ang nasakmitan sa kapulisan ug Bantay Dagat, lakip niini ang F/B Jaurice Steel ug F/B Jaurice 1 nga gipanag-iya ni Crispin Santillan ug ang F/B Nelchris nga gipanag-iya ni Felix Mata alyas Nestor.

Ang mga nasikop naila nga sila si Allan Solitario, 49; Felix Mata, 57; Paterno Ducay, 55; Carmelo Dela Peña, 50; Arnulfo Kaquilala, 49; Marlon Destura, 42; Henry Ofianga, 45; ug Buenafe Layos, 40.

Nasayran nga ang mga nasikop residente ra usab sa nagkadaiyang barangay sa susamang lungsod.

Gawas sa banyera nga isda nga nasakmit, gitanggong usab karon ang tulo ka mga barko ug nasakmit ang mga pukot nga gigamit.

Base sa mando sa hepe sa Bantayan Police nga si Police Chief Insp. Florendo Laude Fajardo, gipanghatag sa kataw­han ang nasakmit nga isda sam­tang anaa sa kustodiya sa Department of Agriculture (Ban­tay Dagat) ang pukot ug barko.

Ang mga dinakpan lakip ang tag-iya sa barko, pasakaan og kasong kalapasan sa Republic Act 10654 kun ang Philippine Fisheries Code. (HBL)

Gipatik sa mantalaang Superbalita Cebu Agosto 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments