2 ka bata sa Talisay patay sa dengue | SunStar

2 ka bata sa Talisay patay sa dengue

Time to read
1 minute
Read so far

2 ka bata sa Talisay patay sa dengue

Saturday, August 12, 2017

NAPUN-AN og laing duha ang nangamatay sa sakit nga dengue sa dakbayan sa Talisay sulod ning sema­naha human mangamatay ang duha ka mga bata.

Ang tanan miabot nag siyam ka mga tawo.

Ang labing uwahing namatay mao ang usa ka batang babaye nga nagpangidaron pag siyam ka buwan.

Samtang si Dr. Lino Alanzado city health officer sa dakbayan sa Talisay, niingon nga wala na sila matingala sa pagsaka karon sa kaso sa dengue diin sila ang nag-una sa tibuok lalawigan sa Sugbo samtang ikatulo sa tibuok Central Visayas.

Base sa report, ang nag-una sa tibuok rehiyon 7 mao ang dakbayan sa Sugbo, ikaduha ang Mandaue City samtang ikatulo sila nga adunay 282 ka mga tawo nagsakit og dengue.

Sukad niadtong Enero hangtod sa Agusto 5, pito ang na­ngamatay.

Gauna gihapon sa tibuok lalawigan sa Sugbo ang Talisay kon ang basehan mao ang gidaghanon sa nasakit ug sa gidaghanon sa namatay.

Si Ema Uy, midwife sa RHU-3, nibutyag nga sa labing uwahi nilang record karong lang sema­naha, usa ka batang babaye nga nagpangidaron pa lang og siyam ka buwan nga taga Barangay Linao, namatay sa dengue.

Laing 6 anyos usab nga lalake nga taga Lawaan ang namatay usab sa dengue ug konpirmado na tungod kay ila nang nakit-an ang kopya sa death certificate sa duha.

Si Alanzado niingon nga wa na sila matingala niini tungod kay grabe ang pagsaka sa kaso sa dengue karong tuiga itandi sa milabayng mga tuig.

Ang maong pagsaka di lang sa dakbayan sa Talisay, kon dili apil na usab sa ubang mga lugar.

Usa ka nakatampo mao ang kanunay nga pag-uwan nga adunay daghang mapundo nga tubig nga maoy itloganan sa lamok.

Gipatik sa mantalaang Superbalita Cebu Agosto 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments