MAS gipahugtan karon sa Mandaue City Police Office (MCPO) ang pag-monitor sa mga balay-kahilayan ug bar bisan pa ang mga gagmayng videokehan aron dali nga masigpatan ang mga iligal nga transaksyon di lang kalabot sa drugas apan lakip kaso sa human trafficking ug prostitusyon.
Kini maoy gipaambit ni PCInsp. Mercy Villaro sa MCPO dihang nahinabi sa mga tigbalita ning bag-o lang.
Sumala ni Villaro nga dugay na kining gihimo sa MCPO apan mas subsob ang ilang himuon karon nga operasyon kini human nga nipatim-aw ang pangalan sa negosyanteng si Kenneth Dong.
Si Dong, kinsa nanag-iya ug usa ka club sa dakbayan sa Mandaue, giingong nalambigit isip middleman ni Richard Tan, tag-iya sa Hong Fei Logistics diin didto gi-deliver ang shipment sa 605 kilos nga gituohang shabu gikan sa nasod sa China.
Matod ni Villaro nga sukad sa ilang mga monitoring nga gihimo, wa sila'y nadawat nga mga taho kalabot sa mga iligal nga transaksyon sud sa club ni Dong gawas lang sa mga hubog nga kustomer niini.
Wa usab silay nahibaw-an nga may mga drugas sud sa maong club.
Apan sa dihang naimbitar ang pangan ni Dong sa Blue Ribbon Committee sa Senado, si Villaro nagkanayon nga wa nila gisalikway ang posibilidad nga may ilegal sud sa club.
Si Villaro nidugang nga panid-an nila ang club ni Dong ug pasudlan kini og non-uniform officer matag karon ug unya.
Giklaro sab ni Villaro nga ang ilang himuon di lang limitado sa club sa maong negosyante apan lakip na sa ubang club, bar, ug bisan mga videokehan.
Si Villaro nagkanayon nga sa maong mga establisemento sagad mahitabo ang mga transaksyon sa iligal nga drugas, kaso sa human trafficking ug prostitusyon. (JPP)