MGB 7 mihimo og ‘subsidence assessment’ sa mga sinkhole sa dakbayan sa Sugbo | SunStar

MGB 7 mihimo og ‘subsidence assessment’ sa mga sinkhole sa dakbayan sa Sugbo

Time to read
1 minute
Read so far

MGB 7 mihimo og ‘subsidence assessment’ sa mga sinkhole sa dakbayan sa Sugbo

Saturday, August 12, 2017

GIHIMO sa Mines and Geoscie­nces Bureau (MGB) 7 ang Subsidence Assessment lukop rehiyon subay niining paglinog ug pag-uwan nga maoy makamugna og sinkhole.

Ang assessment magsuta sa mga dapit diin asa ang haduol sa pagmugna sa pag­hugno sa yuta o sinkhole.

Matod sa chief geologist sa MGB 7 nga si Al Emil Berador nga tungod sa klase sa yuta sa Sugbo nga aduna'y sagol nga limestone o anapog, dali kini mahugno ug makamugna og sinkhole.

Ang dakbayan sa Sugbo lang nasuta nga aduna'y 770 ka sinkholes.

Sumala ni Berador nga kasagarang kayutaan sa Sugbo, maprobinsya o siyudad, adunay limestone o anapog, hinungdan nga mas daghang sinkholes ang ma-develop.

Iya usab gipasabot nga ning nahitabong mga linog, ug kusog nga mga pag-ulan, o mga napundong tubig, ug uban pang factor, di na angay nga katingad-an nga adunay mga mapormang sinkholes.

Ug di angay nga mag-panic ang publiko ug angay hinuon nila buhaton ang pagpahibalo dayon sa lokal nga kagamhanan ug sa ilang local disaster risk reduction and management council, alang sa dinaliang pagpa-cordon niini aron usab way madisgrasya.

Nagpadayon usab ang gihimong vulnerability risk assessment sa MGB 7 alang sa mas komprehensibong pagsuta kon unsa ang posibleng kalamidad sa usa ka lugar, pila ka mga tawo ang maapektohan ug unsang mga imprastraktura usab ang apektado.

Sa assessment, uban ang geohazard map, ang ipang-apud-apod ngadto sa lailaing lokal nga kagam­hanan, alang sa himuong pagpangandam ug paglikay sa posibleng mga kadaot.

Kasamtangang gitutokan sa ahensiya ang mga lugar sa Bohol, ang grabeng naapektuhan sa 7.2 magnitude nga linog niadtong 2013. (HBL)

Gipatik sa mantalaang Superbalita Cebu Agosto 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments