Lider sa sindikato sikop | SunStar

Lider sa sindikato sikop

Time to read
1 minute
Read so far

Lider sa sindikato sikop

Monday, August 14, 2017

NAGPAILANG land developer apan giingong lider sa dakong sindikato sa pagpamaligyag yuta ang nadakpan sa joint operation sa Provincial Intelligence Branch (PIB) sa Cebu Provincial Police Office (CPPO) ug Talisay Police Station sa iyang buhatan sa Barangay Bulacao, dakbayan sa Talisay.

Si Pedro Cabunillas, 64, minyo, ug taga Barangay Lo­oc, lungsod sa Ginatilan, gi­pusasan sa joint team sa kapulisan nga gipangulohan ni Supt. Joie Yape, Jr, hepe sa PIB-CPPO niadtong Biyernes.

Ang kapulisan nisilbi sa 17 ka warrants of arrest batok kang Cabunillas gikan sa korte sa dakbayan sa Sugbo, Lapu-Lapu, ug Talisay tungod sa mga kasong estafa.

Apan si Cabunillas, giposasan sulod sa iyang buhatan sa Asian PDC Property Center sa Barangay Bulacao, Talisay nihimakak sa mga akusasyon ug iyang gipahid ang sala ngadto sa iyang staff ug mga ahente sa yuta.

Ang suspek bana sa barangay kapitan sa Looc, Ginatilan nga si Flordeliz Cabunillas.

Si Yape nagkanayon nga nakadawat sila og daghang reklamo batok kang Cabunillas kabahin sa pagpangilad niini sa mga pumapalit og yuta.

Nagpatungpatong ang dag­hang kaso niini sa estafa dili lang sa Sugbo, kon dili sa ubang bahin sa nasod.

Si Sr. Insp. Nazarino Emia, deputy sa PIB-CPP, nagkanayon nga human sila nakada­wat sa daghang reklamo, gisubay nila sa korte nasuta nga dunay daghang warrants of arrest si Cabunillas hinungdan nga ilang gidakop.

Gibutyag ni Emia nga nationwide ang sindikato nga gipanguluhan ni Cabunillas.

Gipadayag ni Emia nga tataw kaayong pagpangilad ang gihimo ni Cabunillas sanglit daghang nireklamo ang nag-ingon wala kini makarefund sa nabulilyasong pagpalit sa yuta sa ilang mga kustomer apan nagpadayon gihapon sa pagpamaligya og yuta.

Si Emia nanawagan karon sa ubang tawo nga nabiktima sa maong scam nga moduaw sa buhatan sa PIB-CPPO aron mopasakag dugang kaso batok kang Cabunillas.

Si Cabunillas, nahinabi sa SuperBalita Cebu, niangkon nga duna siyay kasong estafa apan sa iyang nahibaw-an duha lang kini ka kaso ug wala masayod nga dunay uban pang warrant tungod sa iyang ka-busy sa paglarga sa Mindanao ug kaulohan.

Gipasanginlan niya ang iyang mga manager, staff ug mga ahente niya sa yuta nga nakaingon sa iyang mga kaso.

"Mibawos man gud na sila nako kay ako mga igsuon. Diha ako gitangtang, ilang mga bana, mga paryente ako gitangtang sa trabaho," matod ni Cabunillas.

Gipadayag niini nga nangasuko ang iyang ubang igsuon nga iyang gitaktak sa trabaho, ug ang ubang ahente sa yuta.

Tungod niini, gipangsultihan ang ilang buyer-kustomer nga i-withdraw ang ilang nahatag nga kuwarta kay mobalhin sila og laing developer.

Matod ni Emia, ang 17 ka warrants ni Cabunillas dunay kalambigitan sa mga kaso nga mobalor og dul-an sa tunga sa milyon ka pesos.

Gipatik sa mantalaang Superbalita Cebu Agosto 14, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments