Pulis wa pay natipi? | SunStar

Pulis wa pay natipi?

Time to read
1 minute
Read so far

Pulis wa pay natipi?

Monday, August 21, 2017

NAG-INUSARA nga panghitabo ang pagkamatay sa 17 anyos nga lalake sa Caloocan City sa miaging semana atol sa anti drug operations sa Caloocan police.

Matod ni Cebu City Police Chief Supt. Joel Doria, way mamatay kon way mosukol sa drug personalities nga target sa ilang anti drug raid.

Gipasigarbo ni Doria nga wa nay nakalas sa ilang Oplan Pokemon sukad niadtong Enero human sa ilang panawagan sa drug personalities nga di na mosukol.

Gisulti kini ni Doria taliwa sa kasuko sa publiko sa kamatayon ni Kian Loyd de los Santos sa mga kamot sa kapulisan sa Caloocan City.

Nigawas sa autopsy nga duna siyay mga samad sa ulo nga nagpakita nga siya nagtalikod.

Matod ni Doria nga sa di pa nila ilusad ang ronda sa tanang police stations, iya kining ipaubos sa briefing nga kon mahimo tahuron ang tawhanong katungod sa mga suspek.

Gipasabot niya nga ang tumong ug tuyo nila sa anti drug operations mao ang pagsikop nga buhi sa mga nalambigit sa illegal nga kalihukan.

“Kung mamapansin nyo during operations, marami tayong baril na nare-recover pero walang encounter. Why? They surrender peacefully. So, buhay sila,” matod ni Doria.

Daghan na silag nadakpan nga mga menor de edad nga gihimong drug courier sa pagtuo nga di sila mapasakaan og kaso tungod sa ilang pangidaron.

Apan taliwa sa pangangkon ni Doria, napatay sa iyang mga sakop niadtong Agusto 1 ang usa ka gikatahapang 29 anyos nga drug pusher.

Giingon nga nisuway pagsukol sa Guadalupe police Drug Enforcement Unit si Alben Mark Comendador, sa buy bust sa may 2nd street, Happy Valley, Barangay Guadalupe.

Gawas sa armas nga .38 kalibreng revolver, nakuhaan siyag tulo ka medium packs sa shabu.

Gikan niadtong Enero, 31 na ang ilang nadakpan, 22 niini napasakaan na og kaso.

Apan sa Philippine Drug Enforcement Agency 7, unom na ang nangamatay nga drug suspects sukad niadtong Agusto 1.

Sa 16 ka operations, 12 niini nangadakpan ug napasakaan og kaso samtang usa ang nakaikyas.

Matod ni Leia Albiar, tigpamaba sa PDEA, nga ang hinungdan nga napatay sa mga operatiba ang maong mga drug personalities mao ang pagsukol niini.

Human sa nahitabo sa Caloocan, nibahad ang pipila ka mga senador nga nasuko sa kamatayon sa usa ka 17 anyos nga lalake nga ilang kunhoran ang budget sa kapulisan sa Oplan Double barrel re-loaded.

Alang kang Doria, dako og ikatabang sa ilang operational expenses ang budget, apan di kini babag sa pagpakigbatok sa illegal nga drugas.

Gipatik sa mantalaang Superbalita Cebu Agosto 22, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments