MOKABAT sa P75,400 ang kantidad sa gituohang shabu nga nasakmit sa kapulisan sa dakbayan sa Lapu-Lapu sa managlahing buy-bust operation nga gipahigayon, diin 10 ka giingong drug personality usa niini Senior Citizen ang nadakpan.
Kagahapon sa kaadlawon maoy labing uwahi nga operasyon nga girumbo sa mga sakop sa Police Station 5 nga gipangulohan ni PSI Alden Zambrano inabagan ni P02 Jade Querubin ug mga kaubanan ang Sityo Saac II, barangay Buaya, Lapu-Lapu City.
Nasikop sila si Mark John Jamisola alyas Opaw, 31; Jolyndo Jimenez Gimoya alyas Taba, 36; Garry Abapo, alyas Bembol, 35; James Jumawan a.k.a. Chino, 18; Billy Casio a.k.a. Billy, 30 ug Ian Madjas alyas Ian, 31 nga pulos residente sa Lapu-Lapu sa managlahing barangay.
Shabu nga gikan sa ilang posisyon gibana-bana nga nagkantidad og P59,000 diin si Jamisola maoy target sa operasyon.
Ang Police Station 3 nipahigayon sab og buy-bust operation niadtong Lunes sa hapon sa Purok Beauty in the Sky, barangay Babay resulta sa pagkasikop nila ni; Feddie Cabalhug, 30 ug Dizzy John Dajao, 24 nga taga-barangay Babag.
Mga pinakete ug usa ka bulto nga adunay sud nga gituohang shabu nga nakuha mobalor sa P11,600.
Samtang ang Senior Citizen Samuel Aying alyas Titi, 67 ug Rednell Amistad a.k.a. Engki, 21 ang wa lung-i sa mga sakop sa Police Station 2 bisan nga adlawng Domingo nihimo og buy-bust operation nga resulta sa pagkasikop sa duruha nga pulos taga-barangay Maribago.
Ang usa ka dosenang pakete nga adunay sud nga gituohan shabu nga nagkantidad og P4,800 ang nakuha sa operatiba.
Ang maong mga dinakpan nagpaabot sa tukmang kaso nga isang-at batok kanila.
Sa dakbayan sa Danao, lima ka gikatahapang mga drug pusher ang nadakpan sa sunosunod nga mga buy bust sa Barangay Looc kagahapon sa kaadlawon.
Mga suspek nga nasikop giilang mao sila si Rocky John Abarquez Casas, Gemma Mae Nudalo Tariao, Bernabe Rosaroso Alvaro, Jaime Penas Tariao ug Eric John Manlosa Rabillas.
Nakuhaan silang tanan og kinatibuk-ang 27 ka gagmay nga mga pakete sa gituohang shabu sa Danao City Drug Enforcement Unit.
Balor kini og P15,930, base sa Dangerous Drugs Board value.
Mga suspek pasakaan og paglapas sa Comprehensive Dangerous Drugs Act of 2002. (FVQ/SunStar Cebu)