NALUNGAG ang dughan sa kawani sa usa ka resort sa lungsod sa Cordova, Sugbo sa dihang wa ihatag niini ang iyang smart phone nga gilabni sa tulisan nga iyang kasakay sa PUJ nga nagsubay sa M.L. Quezon Highway, Lapu-Lapu City.
Wa makabantay ang biktima nga aduna diay kauban ang snatcher nga milipot sa iyang luyo.
Nagpa-alim sa iyang samad dinunggaban si Gilbert Ardines Abing, 27, ulitawo nga taga-Sityo Soong, barangay Mactan, Lapu-Lapu, kawani sa Cordova Reef Resort human gidunggab sa tulisan kay napungot nga wa gilayon gihatag sa biktima ang iyang mobile phone.
Ang pagpanulis nahitabo niadtong Sabado sa kadlawon diin luwan ang biktima sa PUJ gikan sa barangay Pusok ug nabantayan nga misunod sab og sakay ang tulo ka wa pa mailhing lalake.
Nakurat nalang si Abing sa dihang gilabnot sa usa sa mga tulisan ang iyang cellphone nga nagkantidad og P8,000.
Apan sa iyang kahinugon sa butang nga iyang gihago-an suway nga mipalag ang biktima.
Tumoy sa hinagiban mita-op sa dughan ni Abing hinungdan nga napugos siya og buhi sa butang aron nga dili na ma-usban pa og dunggab.
Kalmado nga nanganaog ang mga tulisan ug nagpa-abot og laing PUJ nga kasakyan, base sa saysay sa witness nga natala sa blotter sa Police Station 3.
Sa laing bahin, trabahante sa MEPZ II nga mi-rescue unta sa iyang kauban sa trabaho nga gisuwayan og snatch ang cellphone ang nasamdan sa liog sa dihang wa kabantay nga adunay laing kauban ang tulisan nagsilbing look-out.
Ang biktima gi-ila sa kapulisan nga si Michael Senerpida Bonjoc, 18, production worker sa Matluster Corp. sa Tamiya, barangay Basak ug residente sa barangay Pajo.
Kadlawon niadtong adlawng Biyernes ang hitabo diha sa atubangang bahin sa department store sa M.L. Quezon Highway diin ang 19 anyos nga kauban ni Bonjoc nga si Shimber Estremo gisuwayan og labni ang iyang cellphone.
Tungod sa abag ni Bonjoc wa molampos ang snatcher apan nadunggaban hinuon ang biktima. (FVQ)