DUL-AN dose ka oras nga nalangay ang 207 ka mga pasahero (11 niini mga bata) sa M/V Georich human naguba ang makina sa maong barko.
Matod sa bag-ong Cebu Coast Guard Commander, Jerome Cayabyab, nga gikan sa Dapitan, Zamboanga del Norte ang barko ug nibiya alas 7 sa gabii niadtong Miyerkules.
Moabot unta kini sa alas 6:00 sa buntag kagahapon apan ala 1:45 sa kaadlawn kagahapon dihang nagub-an kini og makina sa kadagatan sa Dalaguete.
Matod ni Cayabyab nga nag-distress call dayon ang kapitan aron ipahibawo sa pasahero ang panghitabo.
Gihatagan ra hinuon og libreng pagkaon ang mga stranded nga pasahero.
Pasado ala 1:00 sa hapon na kagahapon dihang nipahibawo ang kapitan sa Coast Guard nga naayo nila ang makina ug alas 5:00 na sila sa hapon hingpit nga nakadunggo sa Pier 2.
Iya sa George and Peter Lines, usa sa dugay nang shipping company sa Cebu City, ang maong barko.
Gihuwat na usab sa Coast Guard ang marine protest sa kapitan diin isumiter kini sa Maritime Industry Authority (MARINA 7) nga maoy mohimo og pakisusi sa mao nga hitabo. (HBL)