BAG-ONG hepe sa Talisay Police Station gimandoan ni Mayor Eduardo Gullas nga hingusgan pa ang kampanya batok sa ilegal nga drugas ug pagsulbad sa labing bag-o nga krimen nga nahitabo sa ilang siyudad.
Si Supt. Emerson Dante kanhi hepe gihimo na karon nga pangulo sa Provincial Investigation Detective Management Branch.
Ang nihulip kaniya sa puwesto mao si Supt. Jason Villamater gikan sa Regional Drug Enforcement Unit.
Apan dugay kini sa Special Action Force gikan sa pagka Police Officer -1 hangtod nga nahimo siyang superintendent.
Una kining higayon ni Villamater nga nadistino sa usa ka police station.
Si Deputy Provincial Director for Administration Supt. Jaime Quiocho maoy nangulo sa turn-over ceremony nga gitambongan sa mga opisyal sa Talisay pinangulohan ni Mayor Gullas.
Ang mayor mipasalamat sa maayong nahimo ni Dante sa Talisay, diin dako kinig nahimo sa ilang kampanya sa gidiling drugas.
Iyang gibutyag nga wala siya mohangyo nga mailisan si Dante sa puwesto tungod kay nakauyon ra siya niini, apan wala usab siyay supak sa paglingkod sa bag-o niyang hepe.
Matod ni Gullas nga ang kagamhanan sa Talisay sento porsento nga ningpaluyo sa kapulisan.
Wala siyay panangayuon ni Villamater gawas sa pagtrabaho ug pagsulbad sa mga krimen nga nahitabo sa Talisay, usa na niini ang pagpatay sa anak sa kanhi reporter.
Ang Cebu Provincial Police Office niklaro nga promotion ang pagkarelibo ni Dante sa puwesto tungod kay mohupot naman kini sa katungdanan sa tibuok lalawigan.
Sa iyang bahin, si Villamater niangkon nga una kini niyang pagka-hepe apan pinaagi sa tabang sa iyang mga labaw, mga sakop ug mga opisyal sa Talisay, iyang buhaton ang tanan nga makahimo sa trabaho nga gisangon ngadto kaniya.
Pipila ka barangay sa Talisay nabantog sa negosyo sa gidiling drugas apan hinayhinay nang nasanta karon. (DRT)