Simulation exercise sa kapulisan nakapakurat sa publiko | SunStar

Simulation exercise sa kapulisan nakapakurat sa publiko

Time to read
1 minute
Read so far

Simulation exercise sa kapulisan nakapakurat sa publiko

Wednesday, September 13, 2017

Exercise. Mga sakop sa Lapu-Lapu City Police Office Special Weapons and Tactics (Swat) ug ubang units malampusong mingluwas sa usa ka hostage sa usa ka simulation exercise sa usa ka mall sa dakbayan sa Lapu-Lapu kagahapon sa buntag. (Flor V. Querubin)

NANGAUKAY ang mga tawo sa Gaisano Island Mall Mactan sa Pajo Lapu-Lapu City sa pagtuo nga tinuod ang pagpanulis sa usa ka pawnshop sud sa establisemento kagahapon.

Adunay nakurat, nalisang samtang ang uban nakuryuso sa dihang mga lalake nagpatuong nanulis sa Tambunting pawnshop.

Sa ilang paggawas nang-hostage sa nagpaka-aron ingnon nga biktima kansang karsones aduna pay mga lama sa dugo.

Usa lang diay kadto ka simulation exercise nga gipahigayon sa Lapu-Lapu City Police Office diin gibansay-bansay ang mga pulis sa ilang mga angay buhaton sa higayon nga motubag og alarma.

“Atong scenario is robbery alarm. Dunay walo ka robbery suspek. Ang lima nisulod (pawnshop), usa driver. Paggawas nila naay duha nang-hostage kay hapit man sila masakpan,” matod ni Chief Insp. Mark Gifter Sucalit sa City Intelligence Branch.

Si PSupt. Elmer Lim, usa sa mga umpire o observer sa gihimong drill, nitug-an nga adunay siyam ngadto sa 10 ka lapses nga iyang nabantayan nga angay tun-an alang sa mga angay buhaton aron mas epektibo ang pagtubag sa mga alarma.

Usa sa gihinganlan sa opis­yal mao ang pagsiguro sa kaluwasan sa mga tigbalita nga mi-cover sa scenario.

Naobserbahan niya nga nagkatag ang mga tigbalita atol sa coverage ug nahulga ang ilang kaluwasan ilabi na nga adunay mahitabong duguong engkuwentro.

“So ato to i-correct. Sunod atong i-implement nga gikinahanglan adunay intended area for the media aron dili pakalat-kalat,” matod ni Lim. (FVQ)

Gipatik sa mantalaang Superbalita Cebu Septembre 14, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments