HATAGAN ni Mayor Tomas Osmeña og P1 milyon nga balor sa kahimanan ug kagamitan ang police station 2 sa Cebu City Police Office (CCPO) isip ganti sa ilang maayong gipakita bahin sa kampanya batok sa gidiling drugas.
Ang hukom sa mayor nagbase sa rekomendasyon sa buhatan ni Garry Lao, executive director sa City Office for Substance Abuse Prevention (Cosap) diin gilatid ang mga kalampusan ug programa sa station 2 pinangulohan ni PCI Ma. Teresa Macatangay.
Matod ni Lao nga maglangkob sa P1 milyon mao ang kagamitan para mapalambo pa sa kapulisan ang ilang serbisyo ug para sa pagpaspas nga pagtunol sa serbisyo.
Sama panangit sa pagpalit og hand held radio, boots, raincoat, flash lights ug daghan pang uban apan walay labot ang patrol vehicle sanglit aduna nay daghang sakyanan ang mga estasyon sa pulis.
Lakip sa mga programa nga gipatuman ni Macatangay mao ang pagpatawag sa drug surrenderees, poster making contest may labot sa pakigbatok sa ilegal nga druga, paghimo og community based treatment sa surrenderees.
Laing nagustohan ni Lao mao ang pagpakigtambayayong sa police station 2 sa ilang mga gilusad nga programa ngadto sa Cosap ug ang pakig-alayon ngadto sa Department of Interior and Local Government, Philippine Drug Enforcement Agency ug ubang buhatan sa gobiyerno.
Gitug-an ni Lao nga nipatuman na usab og Oplan Pakigsandurot ang station 2 diin sila nakig-alayon sa mga barangay. (PAC)