GITUG-AN sa Cebu Central Post Office nga bisan paman sa makabag-ong teknolohiya karon hilabi na sa electronic mail, apan nagpabilin nga taas gihapon ang circulation sa ilang mga suwat.
Hinuon gibutyag sa Postmaster sa Cebu Post Office nga si Marilyn Omar nga niminus ang personal mails sa mga post office apan anaa gihapon ang business mails diin moabot kini kapin sa 200,000 matag buwan.
Dugang niini nga mas daghan gihapon ang business mail karon bisan paman og daghan na ang mag-email.
Moabot sa 35,000 ang walk-in nila niini matag buwan diin 16,000 usab matag adlaw kining frank mails o kining suwat gikan sa korte.
Gawas niini hugot usab ang ilang kampanya sa pag-edukar sa mga tinun-an kon unsaon pagsuwat og business letter ug kon asa angay ibutang ang address sa gigikanan sa suwat ug ingon man ang distinasyon niini.
Subay usab sa umaabot nga World Post Day karong Oktubre 9, usa ka dungan nga nationwide letter writing contest ang pagahimuon sa nagkadaiyang SM Malls.
Sa Sugbo, 250 ka tinun-an ilang target diin anha sa SM Seaside City Cebu kini himuon.
Ang tema karong tuiga mao ang suwat nila nga alang sa United Nations secretary.
Padayon usab ilang Salamat Po, Teacher nga nationwide writing contest diin sunod tuig na pilian ang daog niini, 27 ka tinun-an ug tunghaan sa semi-grand draw ug lima-lima sa Grand Draw. (HBL)