GIBUTYAG sa Department of Agriculture (DA) 7 nga minus kaayo ang pag-ihaw og iro sa Sugbo ug sa Central Visayas kon itandi sa Luzon.
Matod ni Dr. Verna Agriam-Veterinarian sa DA 7 nga tungod kay dili kultura sa Sugboanon ang mokaon og karne sa iro mao nga wala kini kaayo dinhi sa Sugbo.
Gipasabot usab niini nga ilegal ang pagpatay ug pagkaon niining karne sa iro ingon man nga dili kini makatarunganon ug kalapasan sa Animal Welfare Act.
Ang Island Rescue Organization, usa ka non-government organization diin usa usab sa hugot ang kampanya batok sa pagmaltrato sa mga hayop, nagdawat og 10 ngadto sa 20 ka reklamo sa maltrato sa iro. Matod sa presidente niini nga si Annalyn Aizpuru nga mamahimong mapriso gikan unom ka tuig pataas ang tawo nga mopatay og iro.
Sa pagkakaron, aduna sila’y tulo ka mga kaso nga napasaka batok sa mga nagmaltrato og iro apan na-dismiss ang usa, pending ang duha.
Dugang niini nga usa ning pag-back out sa mga witness nga dili madayon ang pagpasaka og kaso. Dugang ni Aizpuru nga mas nidaghan ilang nadawat nga report aning mga saag nga iro nga wala’y mga amo karon nga ting-uwan tungod kay wala kini’y mapasilungan.
Tambag niini ngadto sa aduna’y makita nga nangmaltrato sa iro, mamahimo kining i-report sa barangay o pulis. (HBL)