NIPASABOT si Congressman Raul del Mar sa iyang pagbotar pabor sa pagpalabang sa General Appropriations Act sa sunod tuig atol sa ikatulong pagbasa sa Ubos Balay Balauranan niadtong Martes sa hapon.
Niuyon siya bisan kon wala gibalik sa iyang kaubanan ang alokasyon alang sa Commission on Human Rights.
Ang kongresista sa amihanang distrito sa dakbayan sa Sugbo namahayag nga maayo og malamdagan ang mga kauban sa pagkonsiderar sa musyon pagpaminos sa pundo sa CHR ngadto sa P1,000.
Una nang nipadayag si Del Mar nga ang gibuhat sa iyang mga kauban kay unconstitutional tungod kay gidid-an niini ang usa ka constitutional office nga makatuman sa iyang mga katungdanan nga nalatid sa Constitution.
“An action, this Chamber can not do unilaterally as we must remind ourselves that what we are unable to do directly we also can no do indirectly,” dugang ni Del Mar.
Ang Ubos Balay-Baluranan nigahin og P508 milyones, nga mas ubos og P143 milyones gikan sa girekomendar nga P678 milyones sa CHR.
Si Del Mar nagtuong kuwangon pa ang maong kantidad.
Siya nagkanayon nga kon ang iyang kaubanan makakita nga duna pay angay mabuhat ang CHR hatagan kini og dako nga pundo.
Suma niya, ang National Expenditure Plan nga giduso sa Department of Budget and Management gikuhaan na ang orihinal nga hangyo sa CHR nga P1.7 bilyones ngadto na lang sa P508 milyones. (SCG)