Mga ginikanan sa Grade 7 nga naghikog ipatawag sa kapulisan

IPATAWAG sa kapulisan ang mga ginikanan sa 17 anyos nga tinun-ang babaye sa Asian College of Technology (ACT) nga niambak gikan sa pansayan sa 7th floor sa tunghaan human unya kini malubong.

Wa lang una tanduga sa kapulisan ang pamilya ni Jonah Villarin, 12th grade sa ACT, kay ilang gitahod ang privacy sa nagbangutang pamilya.

Matod pa ni SPO2 Wetzil Berry sa Homicide Section sa Cebu City Police Office (CCPO) nga nangayo og privacy ang banay Villarin.

Nirekomendar ang kapu­lisan nga ipa autopsy ang lawas ni Villarin, apan anaa ra sa kabanay kon motugot ba sila niini aron unta pagtino kon kini mabdos.

'Dunay mga sulti sulti sa mga kauban, pero dili angay nga tuhoan unless makita sa autopsy,” matod ni Berry.

Sa pagkakaron, gibasihan sa kapolisan ang official statement sa ACT nga naghikog ang dalaga. Makaduha na diay kini nisuway sa pagpakamatay a­pan pulos nangasanta.

Atol sa iyang paghikog, diha diay sa tunghaan ang inahan kay gipatawag sa guidance councilor human nakamati­kod ang iyang kauban nga estudyante ug mga magtutudlo nga lahi na kini og lihok.

Gikatakda usab nga imbitahon sa kapolisan ang hinigugma ug mga classmate aron makahatag og katin-awan kabahin sa hitabo. (JFT-dugang taho ni AYB)