Vendors sa mga kandila sa Birhen sa Regla mitiyabaw sa polisiya

GIDILI na sa simbahan sa Birhen sa Regla sa dakbayan sa Lapu-Lapu ang pagdagkot sa bisan unsang matang sa kandila gawas lang niadtong opisyal nga kandila nga mao ray gitugot sa mga nagdumala sa simbahan.

Gisugdan niadtong Dominggo (Oktubre 1) sa pagpatuman sa maong kamanduan nga giluwatan sa kura sa maong parokya nga si Father Bernand Corpuz.

Tungod niini, mga candle vendor sa simbahan nitiyabaw sa maong kamanduan kay matod pa gikulban sila sa panginabuhian.

Ang opisyal nga kandila nga bugtong maoy gitugotan nga idagkot mao kadtong tag P1 nga brown og kolor nga adunay istampa sa Birhen Maria.

Grupo sa mga manindahay nagkanayon nga ang maong opisyal nga kandila diin ang simbahan maoy supplier mapalit sa P12.50 ang bugkos nga adunay 25 pieces ug sa kadtong makahurot og kahalin moginansiya og P12.50.

Usa sa mga tindera nga nagdumili sa pagpahingalan nibutyag nga di paigo sa ilang inadlaw nga konsumo ang P12.50 nga ginansiya, gawas kon mamaligya sila og laing klase sa kandila sama niadtong dagko nga klase nga mapalit sa tag P10 ang buok.

Apan managkutay mapugos og palit sa official candle kay di magamit sa pagdagkot sa higayon nga lain nga matang sa kandila ang ilang paliton.

Samtang si Corpuz mipasabot nga gihimo kini sa simbahan aron nga mahapsay ug malikayan ang pangilad ngadto sa mga parokyano ilabi na nga daghan na sila og reklamo nga nadawat batok sa mga candle vendor.

Iya usab nga gipahibawo nga bukas ang simbahan alang sa dialogo tali sa mga apektadong tindera aron mapasabot sa ka­tu­yoan sa maong bag-ong ka­man­­­duan nga gipatuman. (FVQ)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph