Negusyante gi-ambush | SunStar

Negusyante gi-ambush

Time to read
1 minute
Read so far

Negusyante gi-ambush

Friday, October 06, 2017

Natusak. Gisusi sa Crime Scene Investigation Section ang natusak sa bala nga sakyanan sa negusyanteng si Vincent Rojo, 39, taga St. Augustine subdivision, Brgy. Tisa, dakbayan sa Sugbo. Si Rojo nakaangkon og mga samad sa ambush, apan di grabe, matod sa kapulisan. (Alan Tangcawan)

GIBANHIGAN sa wa pa mailhing mga tawo ang usa ka negusyante duol sa iyang pinuy-anan sa San Agustine Heights,Barangay Tisa, siyudad sa Sugbo, alas 12:04 kagahapon sa tungang gabii.

Ang biktima giila nga si Vincent Rojo, nga nakaangkon og mga samad sa nagkadaiyang bahin sa lawas human rakraki gamit ang M16 armalite rifle sa mga lalakeng nag-awto.

Matod ni SPO4 Alex Dacua, deputy chief sa Homicide Section sa Cebu City Police Office, di grabe ang naangkon nga mga samad ni Rojo sanglit pulos lang kini tapsing.

Nakahatag na kini og pamahayag sa kapulisan nga mihimo sa imbestigasyon.

Giingong nakabantay na si Rojo samtang nagmaneho sa iyang sports car nga Dodge (GS 1950) nga dunay nagsunod kaniya nga sakyanan hinungdan nga ni-text siya sa iyang pag-umangkon.

“Dili ra fatal ang iyang igo, tapsing. Naa pud sa ulo, tap­sing lang pud. Unya naka-text pa siya sa iyang pag-umangkon nga naay nagsunod kaniya,” matod ni Dacua.

Nakakuha ug 18 ka mga basiyo sa bala sa M16 armalite rifle ang Crime Scene Investigation Section nga ipaubos nila sa cross matching sa PNP Crime Laboratory 7.
Giingong gikan sa buwangan sa siyudad sa Talisay si Rojo.

Sa iyang pagpauli, gisundan siya og usa ka puti nga awto nga dunay mga sakay.

Ang gwardya sa subdivision nitug-an sa CCTN 47 nga iya na unta nga ablihan ang gate aron pasudlon si Rojo apan kalit lang nipaka ang mga buto buto sa armas nga girapido tumong sa sakyanan sa biktima.

Tungod sa iyang kahadlok, iyang gisirado pagbalik ang gate.

Sa dihang namingaw na, iyang gisusi ang sakyanan ni Rojo ug dinhi iyang nakita nga nagkadugo na ang negusyante kinsa gidali nila pagdala sa tambalanan.

“Padung na unta nako ablihan ang gate. Sus, buto-buto na bitaw na. Ako gibalik pagsira,” matod sa guard.

Si Sr. Supt. Joel Doria, hepe sa Cebu City Police Office, nitug-an nga ila pang palawman ang imbestigasyon ilabi na sa mga impormasyon nga na­lambigit sa illegal nga negosyo si Rojo.

Matod ni Doria nga tanang anggulo ilang gipasubay sama sa kalambigitan sa iyang negosyo.

“Lahat ng angulo titingnan natin kase either sa business yun, personal, work related so titingnan natin lahat kung ano ang posible na motive ng suspek,” matod ni Doria.

Mga negosyo

Dunay mga impormasyon nga si Rojo nanag-iya og legal nga mga small town lottery outlets sa southern Cebu, apan ang kapulisan nidumili sa pagkompirmar niini.

Giingong dunay negusyo sa buwangan sa syudad sa Carcar si Rojo ug usa ka imnanan sa maong syudad.

Usa sa mga kasaligang tinubdan sa kapulisan sa syudad sa Sugbo nitug-an ning mantalaan nga milutaw ang pangan ni Rojo nga dakong financier sa illegal numbers game sa southern Cebu.

Gipatik sa mantalaang Superbalita Cebu Oktubre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments