SUBAY niining anunsiyo ni Presidente Rodrigo Duterte nga ang Philippine Drug Enforcement Agency (PDEA) na ang mohimo sa anti-drugs operation sa nasod, nagkadaiyang reaksyon ang gipadayag sa pipila ka opisyal sa dakbayan sa Sugbo.
Si Cebu City Mayor Tomas Osmeña nagdumil pagkomentaryo sa komento niini kon pabor pa siya o dili, dugang sa mayor nga basin og balihon na unya usab iyang pamahayag kon mahatag pa siya bahin niini.
Matod ni Konsehal Joel Garganera nga posibleng gihimo ni nga aksyon sa Presidente tungod sa mga kalapasan nga nahitabo sa kapulisan diin nagtuo kini nga gihimo usa kini ni Duterte aron pag-assess sa sitwasyon.
Apan matod sa konsehal nga kon ang PDEA lang ang mohimo sa mga operation batok sa drugas, di kini nila makaya.
Giuyonan usab kini ni Konsehal Raymond Garcia kinsa nabalaka kay basin og tungod sa maong hitabo, mobalik na sab ang problema sa drugas nga iyang gihulagway nga maoy nag-unang problema karon sa nasod.
Gihulagway usab ni Konsehal Edu Rama nga maayo ang performance ni Cebu City Police Office director SSupt. Joel Doria kon maghisgot og anti-drug campaign sa Cebu City.
Alang usab kang konsehal Pastor Alcover Jr. nga ang problema sa tanan, ang drugas ug kini miingon nga angay unta ang unang gihimo ni Duterte mao ang paglimpyo sa han-ay sa kapulisan sa wa pa mohimo og serious war against drugs sa masa.
Samtang, nagtuo ang taas nga opisyal sa Cebu Provincial Anti Drug Abuse Office nga dili makaya sa Philippine Drug Enforcement Agency kon mag-inusara ra kini sa pagpahigayon og mga operasyon batok sa gidili nga drugas.
Si Ivy Durano-Meca, pangu sa Cpadao, nipadayag nga limitado lang ang mga sakop sa PDEA dinhi sa Central Visayas.
“Wala man gani nila makaya nga nitabang pa si PNP what the more right now,” pamulong niini.
Sa gipirmahan nga memorandum niadtong Oktubre 10, si Presidente Rodrigo Duterte nimando nga ang PDEA ra ang modumala sa tanang mga operasyon pakigbatok sa gidili nga drugas nga maoy nalatid sa Comprehensive Dangerous Drugs Act of 2002 kun Republic Act 9165.
Gitahasan sa presidente ang Philippine National Police, National Bureau of Investigation, Armed Forces of the Philippines, Bureau of Customs, Philippine Postal Office ug tanang ad hoc anti-drug task force nga itugyan ang tanang mga impormasyon nga ilang gikuptan ngadto sa PDEA.
Kini na ang ikaduhang higayon nga nimando si Duterte nga itugyan na sa PDEA ang tanang anti-drug operations.
Si Meca nipasabot nga base sa naunang kamandoan sa presidente wala kini nagmalampuson sa lalawigan sa Sugbo kay wa nabatyagan ang presensiya niini sa kabarangayan base sa yangongo sa mga kapitan.
“Mao man gani to wala magdugay, gibalik ra gihapon ang operations sa PNP. So, I don’t know what made again to make an order to give it back to PDEA solely,” dugang ni Meca.
Dili susama sa kapulisan, matod niya, diin matag local government unit dunay police station ug mga pulis nga makita sa mga tawo. (HBL, SCG)