PNP-petron lakbay ligtas project gilusad | SunStar

PNP-petron lakbay ligtas project gilusad

Time to read
1 minute
Read so far

PNP-petron lakbay ligtas project gilusad

Thursday, October 12, 2017

SUBLING gilusad sa Police Regional Office (PRO) 7 ang PNP- Petron Lakbay Ligtas Project didto sa Barangay Pajo, dakbayan sa Mandaue kagahapon.

Tuyo sa maong programa nga makatabang sa kapulisan nga ilang pagpatunhay sa kahapsay ug kalinaw ilabi na nga nagsingabot na ang mga dagkong kalihukan sa hinapos nga bahin sa tuig.

Matod ni PCSupt. Jose Mario Espino, direktor sa PRO 7 nga unang gilusad ang maong programa niadtong 2015 apan sa panahon nga may dagkong kalihukan lang kini aktibo sama sa kalag-kalag ug Pasko.

Buot karon ni Espino nga himuong permanente ang maong programa.

Ubos sa Lakbay- Ligtas Program, nga tugutan ang kapulisan sa pagbutang ug outpost sa mga gas station sa Petron Gas Station sa tibuok Central Visayas.

Tinguha usab sa PNP nga malukop ang tibuok nasud sa maong programa.

Ang outpost maoy magsilbing dapit nga ka-estambayan sa police nga nag-patrol ilabi na kon rush hour, may bagang duot sa publiko kon may dagkong kalihukan.

Dali na unya maduolan ang kapulisan sa publiko nga nagkinahanglan ug pag-abag sa kapulisan pinaagi lang sap ag-adto sa pinakaduol nga Petron Gas Station.

Ang paglusad sa maong programa kagahapon gihimo didto sa Brgy. Pajo kagahapon diin gihangop ni Kapitan Ahong Chan ang maong tahas nga makatabang sa seguridad sa mga lumolyupyo sa iyang barangay.

Padayag pa ni Chan nga dakong tabang ang programa ilabi na nga sa ilang barangay sagad mag-abot ang mga langyaw ug lokal nga turista nga mosud ug gawas sa Sugbo.

Padayag usab ni Espino nga panahon sa emerhensya ug kalamidad, himuong drop off points ang mga gas station sa mga relief goods sa buot motabang sa mga biktima sa kalamidad.

Nipasalig sab ang kompanyang Petron nga motambayayong sa pagpahibalo sa publiko pinaagi sa pagtabang alang sa information materials nga himuon sa kapulisan bisan sa unsang programa.

Highlight usab sa kalihukan kagahapon mao ang pagsayaw sa mascot ni PO1 Bato atoll sa programa. (JPP)

Gipatik sa mantalaang Superbalita Cebu Oktubre 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments