Largo gipatahan, misukol: hepe | SunStar

Largo gipatahan, misukol: hepe

Time to read
1 minute
Read so far

Largo gipatahan, misukol: hepe

Tuesday, October 17, 2017

GISUWAYAN pa unta sa pagkonbinsir sa kapulisan ang napatay nga si Jessie Largo sa pagtahan nga malinawon apan niuna pa hinuon kini sa pagpamamusil ngadto sa kapulisan.

Kini maoy paghulagway sa hepe sa kapulisan sa Talisay nga si P/ Supt. Jason Villamater kinsa maoy nangu sa operasyon nga miresulta sa pagkamatay ni Largo.

Apan ang igsuon ni Largo miingon nga wa na sila matingala sa wa pagtahan sa ilang igsuon tungod kay daan naman kining mibahad nga di siya mo-surrender sa kapulisan.

Matod ni Villamater nga ang ilang operasyon tipik gihapon sa way hunong nilang pagpapangita ug pagpaniid sa nahimutangan ni Largo.

Iyang gibutyag nga sukad siya milingkod sa katungdanan niadtong miaging buwan daan na siyang giingnan sa iyang mga sakop nga daghan silag nadawat nga report sa nahimutangan ni Largo.

Gani dunay report nga atua sa Leyte, Mindanao, Negros ug sa dakbayan sa Talisay apan sa matag higayon nga ilang susihon negatibo og nakasibat na kini.

Apan niadtong Lunes human niya maseguro nga anaa ang presensiya ni Largo sa lugar dali silang nilusad og operation inubanan sa mga sakop sa Regional Special Operations Group (RSOG).

Ilang gitumbok ang gipuy-an ni Largo nga daw gipangandaman og maayo sanglit gawas sa lisod nga sudlan aduna usay agianan sa luyong bahin paingon na ngadto sa sapa.

Ang mga silingan sa na­matay nagtuo nga daw adunay gisaligan si Largo nga di kini madutlan tungod sa giingong ating-ating.

Apan nakita sa crime scene ang tulo ka botelya nga adunay mga lana ug mga papel nga adunay mga nakasuwat nga latin.

Apan ilang giangkon tulo na ka buwan si Largo nagpuyo sa ilang lugar sa luyong bahin sa Deca Homes, Barangay Dumlog, apan wa sila mo-report tungod sa kahadlok.

Gani makadaghan nang higayon nga magpabuto kini sa iyang armas ilabi na kon mahubog ug adunay kalagutan.

Ilang gihulagway nga sa pagkamatay ni Largo naibtan silag tunok tungod kay sila mismo nabalaka sa ilang seguridad ug sa ilang mga anak.

Ang igsuon ni Largo nga si Jeson Largo, 22, kinsa niatubang sa mga tigbalita niingon nga human nakagawas ang ilang igsuon sa prisohan sa Leyte wa na mobalik sa ilang panimay.

Gipatik sa mantalaang Superbalita Cebu Oktubre 18, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments