GISUGYOT sa usa ka psychiatrist sa Department of Education (DepEd) nga itudlo og apil sa mga klase sa mga tinun-an sa elementarya kon unsaon pagdumala kon ang usa ka tawo nakasinati og depression.
Si Dr. Rene Obra, pangu sa Center for Behavioral Sciences sa Vicente Sotto Memorial Medical Center (VSMMC), namahayag nga mahinungdanon kini aron mahibawo ang mga tinun-an unsaon pag-ila sa ilang classmates nga nag-antos sa depression ug nanginahanglan og atensiyon ug makat-on unsaon pagtabang nila.
Siya nisugyot usab nga angay itudlo og apil ang sex education sa kabataan sa elementarya nga ubos sa Grade 5 aron mahibawo kini bisan sa linghod nga pangidaron unsay angay nga buhaton labi na konserbatibo ang mga pamilya nga Pilipino.
“Kay ang uban mga bata karon gud high school pa lang gani nag-uyab-uyab na,” pahayag ni Obra sa pakighinabi sa Superbalita Cebu.
Siya nibutyag nga base sa ilang pagtuon ang suliran sa relasyon tali sa pamilya ug hinigugma ang nag-una nga rason kon nganong daghang mga batan-on ang maghikog.
Matod niini, kasagaran sa mga nagkutlo sa ilang kinabuhi kay nagpanuigon og 18 anyos hangtod sa 31 anyos nga mas madutlan sa mga problema kon itandi sa mga hamtong nga makasugakod na.
Apil sa pag-ila sa nag-antos og depression ang usa ka tawo ang mawagtangan na og focus sa kinabuhi, klase o trabaho; wala na mag-atiman sa kaugalingon sama sa proper hygiene; wala nay gana moapil sa extra curricular activities; sama sa manugon ug uban pang lihok niini. (SCG)