BISAN kon gilibkas na sa Philippine Atmospheric Geophysical and Astronomical Services Administration ang gale warning, pipila ka mga barko ug motor banca ang wa gihapon mobiyahe tungod sa dagkong bawod.
Si Commander Jerome Cayabyab, pangu sa Coast Guard Station Cebu, nibutyag nga gitugtan na nga makalawig ang gagmay nga mga barko ug motor banca nga ubos sa 250 gross tonnage human gilibkas ang gale warning alas 11 kagahapon sa buntag.
Apan duna gihapoy mga kompaniya og barko ang nihukom nga dili una mobiyahe sanglit delikado gihapon ang bawod sa lawod.
Niadtong Biyernes, labing minos 24 ka mga barko ang wa makabiyahe tungod gihapon sa kadagko sa mga bawod sa kadagatan.
Matod ni Seaman 2 El John Murillo sa operations sa CGSC, nga alas 11 kagahapon sa buntag 33 ka mga barko ug motor banca ang natanggong sa lainlaing mga pantalan sa Sugbo.
Si Joey Figuracion, weather specialist sa Pagasa Visayas, niingon nga wala nay epekto sa hangin sa Central Visayas ang extension sa sirkulasyon sa bagyong Paolo.
Suma pa niini dili na kaayo baluron ang kadagatan sa Central Visayas kon itandi sa nangaging duha ka adlaw hinungdan nga sila niisyu og gale warning.
Ang bagyong Paolo gilauman nga mogawas sa Philippine Area of Responsibility kagabii o sayo ganinang buntag nga dunay lapad nga panganod.
Bisan kon wala nay bagyo o low pressure area, padayon nga mapanganuron ang kalangitan sa Sugbo ug masinati ang katag nga pag-ulan, pagpanugdog ug kilat. (SCG)