LIMPIYO.
Way magtutudlo sa lungsod sa Samboan nga nagpositibo sa surprise drug test.
Ang Cebu Provincial Anti-Drug Abuse Office (CPADAO) nihangop sa kalambuan, ingun man sa nagkadaghan nga mga kawani sa gobiyerno sa Sugbo nga negatibo usab sa gihimo nila nga mga drug testing activity.
Nipahigayon og mandatory drug test ang CPADAO alang sa tanang magtutudlo sa lungsod sa Samboan, lakip na niadtong mga nagserbisyo sa private schools sa imaging semana.
Gitug-an ni CPADAO Executive Director Ivy Meca, 212 ka mga magtutudlo gikan sa 15 ka mga public elementary ug 4 ka national high schools, way bisan usa niini ang nag-positibo sa drug test.
Sukwahi kini sa nahitabo drug test nga gipahigayon sa mga magtutudlo sa duha ka mga piniliang eskwelahan sa siyudad sa Danao, diin dunay usa ka babayeng magtutudlo nga nipositibo.
Gawas sa mga magtutudlo, 18 ka mga personnel sa Samboan Police Station ug sa local nga kagamhanan sa lungsod ang gipaubos sa drug test apan way nagpositibo.
Niadtong Oktobre 20, nakapahigayon sab og drug test sa lungsod sa Consolacion diin duha sa 27 ka mga kawani sa LGU ang ni-positibo. Nag-drug test sab sayo ning buwana sa mao gihapon nga lungsod, ug lima sab ang nipositibo.
Way nag-positibo sa drug test sa 64 ka mga kawani sa Argao District Hospital niadtong Oktobre 19. Sa Santander, dunay usa nga nagpositibo sa pagamit og shabu sa 166 personnel sa PNP ug barangay officials.
Sayo ning buwana, nihimo sab og drug test alang sa 169 ka hospital employees sa Carcar Provincial Hospital ug 29 ka mga kawani sa Pinamungajan District Hospital apan negatibo usab kini.
Alang ni Meca, dako og impluwensiya ang mga empleyado sa gobyerno, ilabi na ang magtutudlo ngadto sa publiko nga dili kini mahilambigit sa isyu sa drugas. (AZDL)