Talisay miandam sa Pond-D nga laing labayanan sa mga basura

GISUGDAN na og himo ang Pond-D sa Talisay land­fill kun butanganan sa ilang mga basura agi'g pagpa­ngandam sa higayon nga ma­puno na ang ilang ka­samtangang gibutangan sa mga basura.

Ang dakbayan sa Talisay naglabay karon sa ilang mga basura sa ilang landfill sa Barangay Tapul.

Sa pagkakaron, ang kasamtangan nilang gigamit mao ang Pond- C sanglit puno naman ang Pond-A ug Pond-B.

Si Talisay City Engr. Gamaliel Vicente, Jr. nibutyag nga ila na kining gihinayhinayan og sugod.

Matod ni Vicente, usa ngadto na sa duha ka tuig gikan karon, hayan mapuno na ang ilang gibutangan sa basura.

Mao kini hinungdan nga nagtukod sila'g laing butanganan ug padayon kini karong gitrabaho nga mogasto og kapin sa P1 milyon.

Iyang gibutyag nga matag pond nga ilang himuon molanat og kapin sa lima ka tuig una mapuno.

Apan dili na sila magpaabot pa nga mapuno ug maghimo sila'g laing butanganan sanglit paspas ang pagsaka sa basura tungod kay wa silay gihimo karon nga segregation kun pagbuwag sa mga basura sa malata ug dili malata.

Si Edwin Nierves, pangulo sa solid waste management sa dakbayan sa Talisay, niangkon nga mao kini karon ang ilang nakita nga suliran sang­lit way disiplina ang mga lumolupyo sa pagbuwag sa ilang mga basura tali sa malata ug dili malata. (DRT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph